പുര നിറഞ്ഞ പെണ്ണ്

പുര നിറഞ്ഞ പെണ്ണ് 

***" ഇങ്ങനെ കിടന്നു ചിരിച്ചു മറിഞ്ഞു തൊണ്ട തുറന്നോ, പെണ്ണാണ് എന്ന ബോധം വേണ്ടേ.നാളെ വേറൊരു വീട്ടിൽ പോകേണ്ടവൾ ആണെന്ന ബോധമില്ല.വായടച്ചു സംസാരിക്കെടി "

"ഉറക്കെ ചിരിച്ചാലോ, ഉച്ചത്തിൽ സംസാരിച്ചാലോ പെണ്ണ് പെണ്ണല്ലാതെ ആകുമോ ?ഇങ്ങനെ പിറന്ന വീട്ടിൽ തന്നെ അവഗണനയുടെ ടേപ്പ് ഒട്ടിക്കപ്പെട്ട പെണ്ണ് മറ്റൊരു വീട്ടിലെ തടവറയെക്കുറിച്ചു നിങ്ങളോടു എങ്ങിനെ സംസാരിക്കാൻ ആണ് ?"

  ***"വയസ്സ് 20 കഴിഞ്ഞില്ലേ, കെട്ടിക്കാറായില്ലേ ?, ഇനിയും വച്ചോണ്ടിരുന്നാ ചന്തമൊക്കെ  പോകും, പിന്നെ ചെറുക്കനെയും കിട്ടൂല "

"20 അല്ലെ ആയുള്ളു, കല്യാണ പ്രായം 20 ആണെന്ന് നിയമം ഒന്നും വന്നില്ലല്ലോ...അവിടിരുന്നോട്ടെ, ഇനി പുതിയ ഒരുത്തൻ ജനിച്ചു വന്നു കെട്ടേണ്ട കാര്യം ഇല്ലല്ലോ.ഉള്ള ചന്തമൊക്കെ  മതി"

***"ഇതിപ്പോ എന്തു പഠിപ്പ് ആണ്, വയസ്സു 27 ആയി, ഇനിയും പഠിക്കാൻ എന്തിരിക്കുന്നു ?കൂടെയുള്ളതുങ്ങളൊക്കെ കെട്ടി പിള്ളേരും ആയി "

"വിദ്യാഭ്യാസത്തിനു പ്രായപരിധി ഒന്നും തീരുമാനിച്ചിട്ടില്ല, പഠിക്കട്ടെ, ജോലി വാങ്ങട്ടെ, സ്വന്തം കാലിൽ നിൽക്കട്ടെ. എന്നിട്ടു ആലോചിക്കാം ബാക്കി"

**"ജോലി വാങ്ങി കുറെ കാശു സമ്പാദിച്ചിട്ട് എന്തിനാ ? പെണ്ണുങ്ങൾ ജോലിക്കു പോയി ചിലവ് നടത്തേണ്ട കാര്യമൊന്നും ഞങ്ങടെ കുടുംബത്തിൽ ഇല്ല"

"കാശ് ഉണ്ടാക്കി ചിലവ് നടത്തുന്നതിന് പെണ്ണെന്നും ആണെന്നും വേർതിരിവിന്റെ ആവശ്യം ഒന്നുമില്ല. പെണ്ണ് ജോലിക്കു പോയാലുടനെ തകരുന്ന പാരമ്പര്യം ആണെങ്കിൽ ആ പാരമ്പര്യം അങ്ങു തച്ചുടച്ചു കളഞ്ഞേക്ക്"

***"വീട് നോക്കി ഭർത്താവിനെയും മക്കളെയും നോക്കി അടങ്ങി ഒതുങ്ങി ജീവിക്കുന്ന പെണ്ണാണ് ഒരു മാതൃകാ യുവതി.പെണ്ണിനെ അങ്ങിനെയാണ് വളർത്തേണ്ടത്.ജോലിക്ക് പോകുന്ന പെണ്ണിന് എവിടെയാ ഇതിനൊക്കെ സമയം"

"ജോലിക്കു പോകുന്ന പെണ്ണുങ്ങളും വീടും കുടുംബവും നോക്കുന്നുണ്ട് ഹേ..വീടിനെ കുളിപ്പിച്ചു lizol മുക്കി,ഭർത്താവിനെ എണീപ്പിച്ചു റെഡിയാക്കി ഒരുക്കി ഓഫീസിൽ വിട്ട്, അമ്മായി അമ്മയ്ക്ക് പാദസേവ ചെയ്തു, മക്കളുടെ ആവശ്യങ്ങൾ നോക്കിയെടുത്തു, സ്വന്തം ആഗ്രഹങ്ങളും സ്വപ്നങ്ങളും മറന്നു വേലക്കാരിയെ പോലെ ജീവിച്ചാൽ മാത്രമെ നല്ല യുവതി ആകുമെങ്കിൽ ആ certificate എന്റെ മകൾക്ക് വേണ്ട.സ്വന്തമായി നിലനിൽപ്പും വ്യക്തിത്വവുമുള്ള ഒരു യുവതിയായി എന്റെ മകൾ വളർന്നാൽ മതി"

***"അല്ലെങ്കിലും കയ്യിൽ നാലു കാശു വന്നാൽ പെൺപിള്ളേർക്ക് അഹങ്കാരമാ. പിന്നെ ആണുങ്ങളെ അനുസരിക്കാൻ അവൾക്കൊക്കെ വലിയ മടി ആയിരിക്കും"

"ഈ പറയുന്നത് കുറെ മൂത്തു നരച്ച അമ്മച്ചിമാർ അല്ലിയോ, വീട്ടിൽ കുത്തിയിരിക്കുന്ന അമ്മച്ചിമാർക്കൊക്കെ അല്ലേലും നാലു കാശു സമ്പാദിക്കുന്ന പെണ്ണുങ്ങളോട് വലിയ കെറുവ് തന്നാ.അതു അവിടെ തന്നെ വച്ചിരുന്നോ.ആണുങ്ങളെ അനുസരിച്ചു ജീവിക്കണം എന്നൊരു ചൊല്ല് വേണ്ട, നല്ലതു പറയുന്നത് ആണായാലും പെണ്ണായാലും അതു പരസ്പരം മനസ്സിലാക്കിയാണ് അനുസരിക്കേണ്ടതും അവഗണിക്കേണ്ടതും"

***"നമ്മള് പെണ്ണുങ്ങൾ എല്ലാം സഹിക്കാനും ക്ഷമിക്കാനും പഠിക്കണം.നാളെ മറ്റൊരു വീട്ടിൽ ജീവിക്കേണ്ടവൾ ആണ്,അവിടത്തെ ചിട്ടകൾക്ക് അനുസരിച്ചു നടക്കേണ്ടവൾ ആണ്.കെട്ടിച്ചു വിട്ട വീടാണ് നിന്റെ വീട്, ജീവിത കാലം മുഴുവനും ജീവിക്കേണ്ട വീട്"

"തീർന്നില്ലേ...അടക്കവും ഒതുക്കവും കൊണ്ടു അവളിലെ പെണ്ണിനെ നിങ്ങൾ കൊന്നു കളഞ്ഞില്ലേ,കീ കൊടുക്കുന്ന പാവയായി ജീവിക്കാൻ അല്ലെ ഈ ക്ലാസ് കൊണ്ടു നിങ്ങൾ അവളെ പ്രാപ്തയാക്കിയത്..സഹനത്തിന്റെ ഒടുവിൽ രക്ഷപ്പെട്ടു വരാൻ സ്വന്തം വീട് പോലും ഇല്ലെന്നു നിങ്ങൾ അവളോട് പറയാതെ പറഞ്ഞു അവളെ ഒരു അന്യ ആക്കിയില്ലേ..മരണം അവളുടെ ഒരേ ഒരു ഓപ്ഷൻ ആക്കി മാറ്റിയില്ലേ നിങ്ങൾ.."

***"സ്ത്രീധനം ആയിട്ടൊന്നും വേണ്ട.പെണ്ണിനെ മാത്രം മതി.നിങ്ങളുടെ മകൾക്ക് എന്തു കൊടുക്കണം എന്നു നിങ്ങൾക്ക് തോന്നുന്നുവോ അതു കൊടുക്കാം.ഞങ്ങള് ഒറ്റമോളെ കെട്ടിച്ചു വിട്ടപ്പോ ആകെ 50 പവനും 10 സെന്റ് സ്ഥലവും ഒരു കാറും മാത്രമേ കൊടുത്തുള്ളു, അവളുടെ ചെക്കൻ വീട്ടുകാർ ഒന്നും ചോദിച്ചിട്ടല്ല,ഞങ്ങടെ മോൾ അല്ലേ..... പിന്നെ നാട്ടുനടപ്പ് അനുസരിച്ചു ചെയ്യണ്ട ചിലതൊക്കെ ഇല്ലേ .സദ്യയ്ക്ക് ഒരു കുറവും വരരുത് എന്ന ഒറ്റ നിബന്ധന മാത്രമേ ഞങ്ങൾക്കുള്ളൂ..."

"അടിപൊളി ...ധർമക്കല്യാണം അല്ലെ..സ്ത്രീധനം ചോദിച്ചില്ല,പകരം സ്വന്തം മകൾക്ക് കൊടുത്തത്തിൽ നിന്നും ഒട്ടും കുറയരുത് എന്നു പറഞ്ഞു വച്ചു.നാട്ടുനടപ്പുകൾ ഓർമിപ്പിച്ചു. എന്തിനാണ് ഈ സ്ത്രീധനവും നാട്ടുനടപ്പും ?കല്യാണം പെൺവീട്ടുകാരുടെ ബാധ്യതയും ആൺവീട്ടുകാരുടെ അവകാശവും അല്ല, മറിച്ചു തലമുറകൾ പരിപാലിക്കപ്പെടാൻ ഇരു കൂട്ടരുടെയും ആവശ്യമാണത്. ചിലവുകൾ പരസ്പരം പങ്ക് വച്ചു ഉള്ളത് കൊണ്ട് കൂട്ടിക്കെട്ടി പണത്തിന്റെ ധൂർത്ത് കാണിക്കാതെ കല്യാണം നടത്തിക്കൂടെ ?ഒരു പെൺകുഞ്ഞിനെ കഴുകനും പരുന്തിനും കൊടുക്കാതെ കഷ്ടപ്പെട്ട് വളർത്തി വലുതാക്കുന്നതും പോരാഞ്ഞ് ജീവിതകാലം മുഴുവനും അവൾക്കു സ്ത്രീധനം എന്ന പേരിൽ ജാമ്യം കൊടുക്കണമെങ്കിൽ പിന്നെ എന്തിനു വിവാഹം കഴിപ്പിക്കണം ?"

***"എനിക്ക് ഒറ്റ മോൾ ആണ്.ഞാൻ ഉണ്ടാക്കിയതൊക്കെ അവൾക്കാണ് .500 പവൻ ഇട്ടു അണിഞ്ഞൊരുങ്ങി ആർഭാടം ആയി തന്നെ കല്യാണം നടത്തണം"

"നിങ്ങളുടെ ആർഭാടം കാരണം ലോണെടുത്തു മുടിഞ്ഞു കല്യാണം നടത്തേണ്ടി വരുന്ന ദരിദ്ര്യവാസി എന്നൊക്കെ നിങ്ങൾ പുച്ഛിക്കുന്ന പാവങ്ങളുടെ അവസ്ഥയോ ?ഉള്ളവനും ഇല്ലാത്തവനും ഒരു പോലെ കല്യാണം നടത്തുന്ന കാലം എന്നൊന്ന് സ്വപ്നം കണ്ടു തുടങ്ങിക്കൂടെ ? രണ്ട് വ്യക്തികളിലൂടെ 2 കുടുംബങ്ങൾ കൂടിച്ചേരുന്നതിന് 200 പവനും 20000 പേർക്ക് സദ്യയും കൊടുക്കേണ്ട കാര്യം ഇല്ല എന്നു ഉറപ്പിച്ചൂടെ ??"

*******

കുട്ടി പെണ്ണായാലും ആണായാലും വിവരവും,വിദ്യാഭ്യാസവും ,വിവേകവും പകർന്നു നൽകി വ്യക്തിത്വമുള്ള സ്വയം പര്യാപ്തരായ വ്യക്തികളായി അവരെ വളർത്തിക്കൊണ്ടു വരേണ്ടതാണ് നമ്മുടെ ഉത്തരവാദിത്വം എന്നു മാതാപിതാക്കൾ ആദ്യം തിരിച്ചറിയുക. അടക്കവും ഒതുക്കവുമുള്ള പെണ്ണ്, മറ്റൊരു വീട്ടിൽ പോയി ജീവിക്കേണ്ടവൾ, എല്ലാം സഹിക്കേണ്ടവൾ, കുടുംബ ഭദ്രതയ്ക്കായി സ്വപ്നങ്ങൾ ത്യജിക്കേണ്ടവൾ തുടങ്ങിയ ബാധ്യതയുടെ ലേബലുകൾ ഓർമ വയ്ക്കുമ്പോൾ മുതൽ അടിച്ചേല്പിച്ച് ഒരു പെൺകുട്ടിയെ  സ്വയം മൂല്യമില്ലാത്തവളായി മാറ്റാതിരിക്കുക.

വിവാഹം ജീവിതത്തിലെ ഒരു ആവശ്യം മാത്രമാണെന്നും രണ്ടു കുടുംബങ്ങളും ചേർന്നു നടത്തേണ്ട -പരസ്പര ധാരണയിലും വിശ്വാസത്തിലും പടുത്തുയർത്തേണ്ട ഒരു ബന്ധമാണിതെന്നും നാം മനസ്സിലാക്കണം.സ്ത്രീധനവും സമ്പത്തും കണക്കു പറഞ്ഞു ആരുടെയും കഴുത്തറുക്കാതിരിക്കണം. ഇഷ്ടമില്ലാത്തിനോട് NO പറയാനും ഇഷ്ടമുള്ള കാര്യങ്ങളെ നേരായ രീതിയിൽ തിരഞ്ഞെടുത്തു മുന്നേറാനും നമ്മുടെ പെണ്മക്കളെ പ്രാപ്തരാക്കണം.

ഉത്തമയായ മരുമകൾ എന്നാൽ ഭർത്താവിന്റെ അടിച്ചുതളിക്കാരിയായും, അമ്മായി അമ്മയുടെ അടുക്കളകാരിയായും, അലാറം വച്ചു ഉറക്കം എണീറ്റു അടിമയെപ്പോലെ നിങ്ങളുടെ നിയമങ്ങൾ അനുസരിച്ചു ജീവിക്കേണ്ട പാവ അല്ലെന്നു എല്ലാ ആണ്മക്കളുടെയും അമ്മമാർ തിരിച്ചറിയുക. മരുമകൾ രാവിലെ ഉറക്കമെണീറ്റ് കുളിച്ചൊരുങ്ങി നിങ്ങൾ പറയുന്ന പോലെ മകന്റെ കാര്യങ്ങളും വീട്ടുകാര്യങ്ങളും നോക്കി (അടങ്ങി ഒതുങ്ങി)ജീവിക്കുന്നത് അമ്മായി അമ്മയെയോ ഭർത്താവിനെയോ ഭയന്നല്ല, തന്നെ കഷ്ടപ്പെട്ടു വളർത്തി വലുതാക്കിയ വീട്ടുകാരെ ഓർത്തും തന്റെ കണ്ണു നനയുന്നത് അവരുടെ ഹൃദയത്തിൽ നിന്നും ചോര പൊടിയുന്നതിനു സമം ആണെന്നും അവൾ വിശ്വസിക്കുന്നതു കൊണ്ടാണെന്നു നിങ്ങൾ തിരിച്ചറിയുക.

ആണായാലും പെണ്ണായാലും അവർ വ്യക്തികളാണ് .സ്വന്തമായി ആഗ്രഹങ്ങളും, പ്രതീക്ഷകളും ഉള്ള, ജീവിതത്തെ കുറിച്ച് സ്വന്തമായി കാഴ്ചപ്പാടുകളുള്ള സ്നേഹവും, ബഹുമാനവും ഒപ്പം സ്വയം ഒരു സ്പേസും  ആഗ്രഹിക്കുന്ന വ്യക്തികൾ .

സ്വീകരണമുറി ആണിനും അടുക്കള പെണ്ണിനും തീറെഴുതി കൊടുത്ത ആചാരങ്ങളെ മറക്കേണ്ട കാലം അതിക്രമിച്ചിരിക്കുന്നു എന്ന് നാം തിരിച്ചറിയുക.ആണ്മക്കളെയും പെൺമക്കളെയും വേർതിരിവുകളില്ലാതെ വളർത്താനും , വിദ്യാഭ്യാസത്തിനൊപ്പം വിവേകം പകർന്നു നൽകാനും നമുക്ക് കഴിയണം.

വാൽകഷ്ണം :-

*** കണക്കു പറഞ്ഞു വാങ്ങുന്ന എച്ചികളെയും, ചോദിക്കുന്നതിന്റെ ഇരട്ടി കൊടുക്കുന്ന പണമാക്രികളെയും, തനിക്കു സ്വർണവും പണവും തന്നു ആർഭാടപൂർവം കല്യാണം നടത്തേണ്ടത് അച്ഛന്റെ കടമയാണെന്ന് വിശ്വസിക്കുന്ന കൂപമണ്ഡൂകങ്ങളായ പെൺമക്കളെയും ,ഭാര്യയുടെ സ്ത്രീധനം കൊണ്ടാണ് തനിക്കു വീടും കാറും ഉണ്ടാകേണ്ടത്  എന്ന് ആഗ്രഹിക്കുന്ന പോങ്ങന്മാരായ ഭർത്താക്കന്മാരേയും, പോക്കില്ലെങ്കിലും കടം വാങ്ങി മുടിഞ്ഞും ലോണെടുത്തും മകളെ കെട്ടിക്കേണ്ടത് തന്റെ ഉത്തരവാദിത്വം ആണെന്ന് വിശ്വസിക്കുന്ന പാവം പാവം അച്ഛനമ്മമാരെയും ,

ഹോസ്റ്റലിലെ വാർഡനേക്കാൾ ഭീകര ജീവിയായാൽ മാത്രമേ അമ്മായി വാല്യൂ കിട്ടു എന്ന് കരുതുന്ന അമ്മായി അമ്മമാരെയും നല്ല ചൂരലെടുത്തു നാല് കൊടുത്ത് നന്നാക്കിയാൽ ഒരു വിധം സ്ത്രീധന പ്രശ്നങ്ങളൊക്കെ ഒഴിഞ്ഞു കിട്ടും .

*** അടക്കി ഒതുക്കി വളർത്തിയില്ലെങ്കിൽ ഏവന്റെയെങ്കിലും കൂടെ പോയി കുടുംബത്തിന് നാണക്കേടുണ്ടാക്കും എന്ന് കമന്റ് പറഞ്ഞാൽ അതിനെ അനുകൂലിക്കാനോ പ്രതികൂലിക്കാനോ ഇപ്പോൾ നിൽക്കുന്നില്ല .അതിനു വേണ്ടി ഇനിയൊരിക്കൽ ഒരു കുറിപ്പെഴുതാം, ഇതിനെ കൂടെ പറഞ്ഞാൽ ശരിയാകില്ല അതിനെ കുറിച്ച് വിശദമായി മനസ്സിലാക്കിയ ശേഷം ഒരു കുറിപ്പെഴുതാം എന്നാണു ഇപ്പോളത്തെ മറുപടി.

***ഇനി ആദർശം പറയുന്ന നിന്റെ കല്യാണത്തിന് ഒന്നും കൊടുത്തില്ലയോ എന്ന് ചോദിച്ചാൽ , കെട്ടിച്ച പ്രായത്തിൽ ആദർശം പറയാൻ അറിയില്ലായിരുന്നു എന്ന് മറുപടി .ഇന്ന് മനസ്സിലാക്കുന്ന ആദർശങ്ങൾ ശരിയാണെങ്കിൽ അതിനെ ജീവിതത്തിൽ പ്രാവർത്തികമാക്കാൻ ശ്രമിക്കുന്നത് തെറ്റല്ലെന്ന് വിശ്വസിക്കുന്നു 

*** നല്ലവരായ മനുഷ്യർ വഴിമാറി നിൽക്കുക, ഇത് നിങ്ങളെക്കുറിച്ചല്ല .മേൽപ്പറഞ്ഞ ചിന്തകളുമായി നടക്കുന്നവരോട് മാത്രം പറയുന്നത് ആണ്

©️Bismitha.B

©️Bismitha@njangandhialla

happy women's day

LeT ShE DeciDes ThE eXpiRy DaTe Of HeR Dreams....

കാരണം അവളും സ്വപ്നങ്ങളും , ആഗ്രഹങ്ങളും ഉള്ള ഒരു സാധാരണ മനുഷ്യൻ തന്നെയാണ് ....!!!!!!!!

" ഒരല്പം പരിഗണന ...,
 ഒരു വ്യക്തി എന്ന നിലയിൽ താൻ അംഗീകരിക്കപ്പെടുന്നുവെന്ന തോന്നൽ ....., തനിക്കായി തന്റെ ചിന്തകൾക്കായി ,സ്വപ്നങ്ങൾക്കായി മറ്റുള്ളവരുടെ മനസ്സിൽ ഒരിടം ..... "
-ഇത്രയും മതി ഭൂമിയിലെ ഓരോ പെണ്ണിനും അവളുടെ ജീവിതം സ്വർഗത്തേക്കാൾ മനോഹരമാകാൻ .....പക്ഷെ ആ തിരിച്ചറിവ് ഈ  സമൂഹം ഇന്നും നേടിയിട്ടില്ല .

ഭൂമിയിലെ മനോഹാരിതയിലേക്ക് കണ്ണ് തുറക്കുന്ന ഓരോ പെൺകുഞ്ഞും അവൾ പോലുമറിയാത്ത കുറെ അദ്രിശ്യമായ ചങ്ങലകളിൽ ബന്ധിതയാണ് ...ഒരു ചട്ടക്കൂടിനുള്ളിൽ പെണ്ണ് എന്ന പേരിൽ നിയന്ത്രണങ്ങൾക്കും , നിബന്ധനകൾക്കുമടിമയായി അവൾ വളരുന്നു ...
പെൺകുട്ടി എന്നാൽ എല്ലാം സഹിക്കേണ്ടവൾ ആണെന്നും , സ്ത്രീ എന്നാൽ ക്ഷമയുടെ പര്യായം ആണെന്നും , അമ്മ എന്നാൽ ഭൂമി ദേവിയോളം താഴ്മയുള്ളവൾ ആണെന്നും പണ്ട് മുതലേ പറഞ്ഞു പഠിപ്പിച്ച സംസ്കാരത്തിൽ നിന്നും ഇന്നും വ്യതിചലിക്കാതെ , ആ പാത തന്നെ തലമുറകളിൽ നിന്ന് തലമുറകളിലേക്ക് പകർന്നു സ്വയം നിലനില്പ്പോ , വ്യക്തിത്വമോ ഇല്ലാത്ത ഒരുവളായി സമൂഹം സ്ത്രീയെ മാറ്റിയിരിക്കുന്നു ....

സ്ത്രീയും ഒരു വ്യക്തിയാണ് . ഒരു സമൂഹത്തിൽ പുരുഷൻ വിരാജിക്കുന്ന സ്വാതന്ത്ര്യങ്ങൾ അവളും ആഗ്രഹിക്കുന്നുണ്ട് ......ആ സ്വാതന്ത്ര്യം രാത്രിയിലെ സഞ്ചാരമോ , ലെഗ്ഗിന്സ് ധരിക്കാനുള്ള അവകാശമോ അല്ല...
മറിച്ചു താൻ ഒരു സ്വതന്ത്ര വ്യക്തി ആണെന്നും , ഒരു പുരുഷൻ ആഗ്രഹിക്കുന്ന പോലെ , അവൻ കാണുന്ന പോലെ സ്വപ്‌നങ്ങൾ താനും കാണുന്നു എന്നുമുള്ള സത്യത്തിന്റെ അംഗീകാരമാണ് അവൾ തേടുന്ന സ്വാതന്ത്ര്യം ....
പക്ഷെ പാരമ്പര്യത്തിന്റെയും , കുലമഹിമയുടെയും , മതത്തിന്റെയും ചട്ടക്കൂടുകൾ അവളെ തളച്ചിടുന്നു ....ഒടുവിൽ സ്വന്തം സ്വപ്നങ്ങള്ക്ക് പ്രൈസ് ടാഗുമിട്ടു അവളും ജീവിക്കും ..എന്തിനോ വേണ്ടി,,,,ആർക്കോ വേണ്ടി ....ഈ ജീവിതം ദാനമായി നല്കിയ ഈശ്വരനെ പഴിച്ചും , ഈ വിധിയിൽ ഒടുങ്ങിത്തീരേണ്ട തന്റെ ജീവിതത്തെ കുറിച്ചോർത്തു സ്വയം വെറുത്തും ........

"നീ പെണ്ണാണ് ...നീ ഉറക്കെ ചിരിക്കരുത് , നീ കരയുന്നത് മറ്റാരുമറിയരുത്...
ആരെന്തു പറഞ്ഞാലും നീ അനുസരിക്കണം ......വിവാഹത്തിനു മുൻപ് വീട്ടുകാർ പറയുന്നതാണ് നിന്റെ ജീവിതം ....വിവാഹ ശേഷം ഭർത്താവും അദ്ദേഹത്തിന്റെ വീട്ടുകാരും തീരുമാനിക്കും പോലെയാണ് നിന്റെ ജീവിതം ..."
ഇതാണ് ഒരു ശരാശരി മലയാളി തന്റെ കുട്ടിയെ പറഞ്ഞു പഠിപ്പിക്കുന്ന ജീവിത പാഠം .....ഒന്ന് ചോദിച്ചോട്ടെ ...??? ഇതിനിടയിൽ എവിടെയാണ് അവൾക്കൊരു ജീവിതം ....???? മറ്റുള്ളവരുടെ ഇഷ്ടങ്ങൾക്കനുസരിച്ചു അവൾ അവളുടെ സ്വത്വം മാറ്റുകയാണ് ....ഓരോ നിമിഷവും അവൾ അവളല്ലാതായി മാറുകയാണ് .....

സ്വന്തം ആഗ്രഹങ്ങളെ എല്ലാം  വേണ്ടെന്നു വയ്ക്കുക ....സ്നേഹിക്കുന്നവരുടെ ആഗ്രഹങ്ങളെ സ്വീകരിക്കേണ്ടി വരുക ...അപ്പോൾ സ്വയം തോന്നുന്ന വികാരം എന്താണെന്ന് അറിയുമോ....??? നമുക്ക് നമ്മോടു തന്നെ വെറുപ്പും പുച്ഛവും തോന്നും , ഒന്നിനും കൊള്ളാത്ത പാഴായിപ്പോയ ജന്മം എന്ന് തോന്നും ....ആ തോന്നൽ ചെന്ന് അവസാനിക്കുന്നത് ഒരു പക്ഷെ ഒരു ആത്മഹത്യയിലെക്കാവും ...
ഒരു സ്ത്രീയുടെ വേദന ഒരിക്കലും ലോകത്തൊരു പുരുഷനും വ്യക്തമായി മനസ്സിലാക്കാനാകില്ല...അങ്ങിനെ മനസ്സിലാക്കാൻ കഴിയുന്ന പുരുഷന്മാർ ഉണ്ടെങ്കിൽ അവർ ഈശ്വരന് സമന്മാരാണ് .....

സ്വന്തം വീട്ടിലെ ബന്ധനങ്ങളിൽ കഴിയുമ്പോൾ ഒരു പെണ്ണിന്റെ ഏക പ്രതീക്ഷ വിവാഹാനന്തര ജീവിതം മാത്രമാണ് .....നിന്റെ ഇഷ്ടങ്ങളൊക്കെ വിവാഹം കഴിഞ്ഞു മതി എന്ന വീട്ടുകാരുടെ ഒരു വാക്ക് ....,ആ കച്ചിത്തുരുമ്പാണ്  വിവാഹം വരെ അവളുടെ ജീവിതത്തിന്റെ ആയുസ്സ് നീട്ടുന്നത് ....മധുവിധു നാളുകളിലെ മനോഹാരിത അവസാനിക്കുമ്പോൾ അവളും തിരിച്ചറിയും -ഇവിടെയും തന്റെ ഇഷ്ടങ്ങൾക്ക് യാതൊരു വിലയും ഇല്ലെന്ന്...പക്ഷെ അപ്പോഴേക്കും അവളുടെ തണലിൽ വളരാൻ കൊതിക്കുന്ന ഒരു ജീവൻ ഭൂമിയിലെ വെളിച്ചത്തിലേക്ക് മിഴി തുറന്നിരിക്കും....പിന്നെ എല്ലാ പെൺകുട്ടികളുടെയും ജീവിതം ഇതാണ് എന്നും തന്റെയും ജീവിതം ഇങ്ങനെയായിരിക്കും എന്നും സ്വയം പറഞ്ഞു വിശ്വസിപ്പിച്ചു അവൾ ജീവിക്കും .... അവസാനം തിരിഞ്ഞു നോക്കുമ്പോൾ സ്വന്തമായി ഈ ജീവിതം കൊണ്ട് താൻ ഒന്നും നേടിയില്ലെന്ന തിരിച്ചറിവ് മാത്രം ആകും ബാക്കി ,,,,,, 
ലോകത്ത് എല്ലാ പെൺകുട്ടികളുടെയും ജീവിതം ഇങ്ങനെയല്ല , പക്ഷെ ഒരു ശരാശരി മലയാളി പെൺകുട്ടിയുടെ ജീവിതം ഇങ്ങനെയാണ് ...

പ്രായപൂർത്തിയാകുന്നത് വരെ വീട്ടുകാർ മാത്രമാണ് അവളുടെ ആശ്രയം ..
വിവാഹം കഴിഞ്ഞാൽ ഭർത്താവ് മാത്രവും ,,,,,
 എത്ര വലിയ കുടുംബം ഉണ്ടെന്നു പറഞ്ഞാലും ഒരുവന്റെ താലി കഴുത്തിൽ വീണു കഴിഞ്ഞാൽ പിന്നെ അവൻ ഇല്ലെങ്കിൽ തനിക്കു ആരുമില്ലെന്നുള്ള തിരിച്ചറിവ് ...
"പറ്റില്ല , ചെയ്യില്ല , സാധ്യമല്ല എന്നൊക്കെ പറഞ്ഞാൽ ഈ കിട്ടുന്ന സ്നേഹം തനിക്കു നഷ്ടമായെക്കുമോ എന്നും , താൻ ഒറ്റപ്പെട്ടെക്കുമോ എന്നുമുള്ള പേടി ....
ഈ തിരിച്ചറിവുകളാണ് അടിമത്തത്തെ സ്നേഹിക്കാനും , സ്വന്തം സ്വപ്നങ്ങളെ ത്യജിക്കാനും അവളെ നിർബന്ധിക്കുന്നത്‌

അടുത്തൊരു വനിതാ ദിനം കൂടി കടന്നു പോയി ....
There is a MAN in every WOman
There is a HE in every She
There is a LAD in every Lady
There is an ADAM in every Madam
എന്ന് ഓഫീസിലെ സാറ് പ്രസംഗിച്ചും പോയി .....

വനിതാ ദിനത്തിൽ മാത്രം സ്ത്രീ അമ്മയാണ് , ഭാര്യയാണ് , ഒരു തലമുറയുടെ വഴികാട്ടിയാണ് , ഗൃഹഭരണവും , ഓഫീസ് ഭരണവും തുടങ്ങി പല ജോലികളെ ഒരു പോലെ സമ്മേളിച്ചു കൊണ്ട് പോകാൻ കഴിവുള്ളവളാണ്. രാവിലെ ഉറക്കമെണീറ്റ് ഇരുട്ടുന്നതു വരെ പണിയെടുത്തു ഒരു പരാതിയും പരിഭവവും പറയാതെ ജീവിക്കുന്നവളാണ്........ എന്നൊക്കെ പ്രസംഗിച്ചിട്ടു ഒരു ഹാപ്പി വിമൻസ് ഡേ ആശംസിച്ചു പോകുന്ന മഹാ പുരുഷന്മാർ ഒരു മാസത്തേക്ക് സ്ത്രീയുടെ സ്ഥാനം ഏറ്റെടുത്തു നടത്തിനോക്കണം .......അപ്പോൾ മാത്രമേ മനസ്സിലാകു ഒരു സ്ത്രീയുടെ വില ......

ആഹ്.....ഫെമിനിസ്റ്റുകളെപ്പോലെ കുറെ സംസാരിച്ചു .....ഇത് ഫെമിനിസം ഒന്നുമല്ല ....ഒരു ശരാശരി മലയാളി പെൺകുട്ടിയുടെ അവസ്ഥയാണ് ....എതിര്ത്തു പറഞ്ഞാലോ , ചോദ്യം ചെയ്താലോ അഹങ്കാരിയാണെന്ന് മറ്റുള്ളവർ  മുദ്ര കുത്തുമെന്നു ഭയന്ന് എല്ലാം ഉള്ളിലടക്കി ജീവിക്കുന്ന ഓരോ പെണ്ണിന്റെയും ജീവിതമാണ് ........ഇതൊക്കെ മാറുമായിരിക്കും അല്ലെ.......??????

 പുസ്തകത്താളുകളിലും , അക്ഷരക്കൂട്ടുകളിലും  ഒതുങ്ങുന്ന പെണ്ണിന്റെ മഹത്വം എല്ലാവരും തിരിച്ചറിയുന്ന ഒരു വനിതാ ദിനത്തിലേക്കായുള്ള കാത്തിരുപ്പ് ഇനിയും ബാക്കി ......

ആ മനോഹര തീരത്ത് തരുമോ ഇനിയൊരു ജന്മം കൂടി ....!

ആ മനോഹര തീരത്ത് തരുമോ ഇനിയൊരു ജന്മം കൂടി ....!

ഒരു രാത്രി ഞാൻ ജനിച്ചു വളർന്ന ,എന്‍റെ

സ്വന്തം വീട്ടിലേക്കു പോകണം.... ഒന്നുറങ്ങണം.....നേരം പുലരുന്നത് വരെ..... നല്ല തണുത്ത വള്ളത്തിൽ കുളിക്കണം....കുളിരണം....മതിയാകും വരെ.... അമ്മയുടെ കൈ കൊണ്ടുണ്ടാക്കിയ ഇഷ്ട ഭക്ഷണം കഴിക്കണം.... അച്ഛനോടും ഏട്ടനോടും ഒപ്പമിരുന്നു കൊച്ചു വർത്തമാനം പറയണം.... ജനിച്ചു വളർന്ന വീട്ടിൽ കളിച്ചുറങ്ങിയ മുറിയിൽ കുറെ നേരം തനിച്ചിരിക്കണം.... പൂമുഖത്തെ സോഫയിൽ ചാരിയിരുന്നു കൂട്ടുകാരെയൊക്കെ വിളിച്ചു സംസാരിക്കണം..... അമ്മയുടെ മടിയിൽ തല ചായ്ച്ചു മതിയാവോളം കിടക്കണം.... അച്ഛന്റെ നെഞ്ചിലെ ചൂടിൽ സങ്കടങ്ങളൊക്കെ ഉരുകിയൊലിക്കണം..... കുളിമുറിയിൽ കയറി കതകടച്ചു പാട്ടു പാടണം.... കണ്ണാടി നോക്കി കുറച്ചു നേരം എന്നോട് തന്നെ സംസാരിക്കണം..... ഇതൊന്നും നടന്നില്ലേൽ ആരോടും പറയാതെ ഒരു ദിവസം രാവിലെ അങ്ങെണീറ്റു പോകണം.....മതിയാവോളം തനിച്ചിരുന്നിട്ടു തിരികെ വരണം.... എന്‍റെ വീട്....എന്‍റെ മുറി... എന്‍റെ അമ്മ.... ..എന്‍റെ അച്ഛൻ....എന്‍റെ കൂടപ്പിറപ്പുകൾ.... എന്‍റെ സ്വപ്‌നങ്ങൾ....എന്‍റെ കുഞ്ഞു കുഞ്ഞു സന്തോഷങ്ങൾ.....എന്‍റെ ചെറിയ വട്ടുകൾ...... ഞാൻ.... ഒരു താലി ചരട് കൊണ്ട് എന്നിൽ നിന്നും മുറിച്ചു മാറ്റപ്പെട്ട ഇരുപതു വർഷങ്ങളിലെ ഞാൻ....... ആർക്കൊക്കെയോ വേണ്ടി ജീവിച്ചപ്പോൾ എനിക്ക് എന്നെ നഷ്ടപ്പെട്ടിട്ടില്ല എന്ന് എനിക്കൊന്നു ഉറപ്പിക്കണം......അതിനു വേണ്ടി കുറച്ചു ദിവസങ്ങൾ എനിക്കും വേണം...... വിവാഹിതയായ ഏതൊരു പെണ്ണിന്റെയും സ്വപ്നമാണിത്......എന്റെയും....

നന്ദി ദൈവമേ ....ഈ ജീവിതം കൊണ്ട് ഞാൻ ഒരുപാട് നേടി .....ഒരുപാടൊരുപാട് ......

നന്ദി ദൈവമേ ....ഈ ജീവിതം കൊണ്ട് ഞാൻ ഒരുപാട് നേടി .....ഒരുപാടൊരുപാട് ......

താൽക്കാലിക വിരാമത്തിനു അവിരാമമിട്ടു കൊണ്ട് വീണ്ടും ഞാനെന്റെ തട്ടകത്തിലേക്കു തിരികെ എത്തുകയാണ് .ഇത് വരെ കൂടെ നിന്നവർക്കും ,ഇനി കൂടെ നിൽക്കാൻ താല്പര്യമുള്ളവർക്കും ഹൃദയം നിറഞ്ഞ നന്ദി ...

ഒരു വർഷത്തെ നീണ്ട ഇടവേളയ്ക്കു ശേഷം തൂലിക ചലിപ്പിക്കാനൊരുങ്ങുമ്പോൾ പറയാൻ ബാക്കി വച്ച കുറെയേറെ  ജീവിതാനുഭവങ്ങളുടെ നീണ്ട നിര തന്നെയുണ്ട് പിന്നിൽ .എന്നെ മാത്രം വിശ്വസിച്ചു ഈ ഭൂമിയുടെ മനോഹാരിതയിലേക്കു കണ്ണ് തുറക്കാൻ കൊതിച്ച ചിപ്പിക്കുൾമുത്തിനായി മാറ്റി വച്ചതായിരുന്നു ഈ ദിനങ്ങളത്രയും .....

അമ്മയാകുക,,
 കേൾക്കാൻ സുഖമാണ്.... , 
അനുഭവിക്കുക മാധുര്യം ഏറെയാണെങ്കിലും പ്രയാസമാണ് ....
ജീവിക്കൽ പോരാട്ടമാണ് ....
ആ പോരാട്ടത്തിന്റെ പടിവാതിൽ ഞാനും തുറന്നു .....

അദമ്യമായ നന്ദി ...
സർവേശ്വരനോട്...., 
അതിലേറെ നാളിതു വരെ താങ്ങും തണലുമായി നിന്ന പ്രിയപ്പെട്ട ഭർത്താവിനോട് ....

ഓരോ അമ്മയും ഏതൊക്കെ പ്രയാസങ്ങൾ അനുഭവിച്ചാണ് ഒരു കുഞ്ഞിന് ജന്മം നൽകുന്നത് എന്ന് തിരിച്ചറിയണമെങ്കിൽ 'അമ്മ ആയെ മതിയാകു ....എന്റെ ഇരുപത്തിമൂന്നു വർഷത്തെ ജീവിതത്തിനും , സന്തോഷത്തിനും വേണ്ടി എന്റെ 'അമ്മ മാറ്റി വച്ച- അമ്മയുടെ ജീവിതം എന്താണെന്ന് മനസിലാക്കാൻ വേണ്ടിയുള്ള യാത്ര കൂടിയാണ് ഇനി മുന്പോട്ടുള്ള ജീവിതം .

സങ്കടങ്ങൾ മൂർദ്ധന്യത്തിൽ എത്തുമ്പോൾ മരണത്തേക്കാൾ വലിയ മരുന്നൊന്നുമില്ലെന്നു തോന്നിയ പല നിമിഷങ്ങളും ജീവിതത്തിൽ ഉണ്ടായിട്ടുണ്ട് ,,,,എന്നാലിന്ന് എന്റെ കുഞ്ഞിന് വേണ്ടി ജീവിക്കാൻ ആഗ്രഹിക്കുമ്പോൾ മരണത്തിനോട് പോലും കൈകൂപ്പുകയാണ് ,,,,എന്നെ തേടി വേഗത്തിലൊന്നും വരരുതേ എന്ന് .

സന്തുഷ്ടയാണ് .....
ഇത് വരെ ജീവിക്കാൻ കഴിഞ്ഞതിൽ ...
നല്ലൊരമ്മയുടെ അധികം മോശമല്ലാത്ത മകളാകാൻ കഴിഞ്ഞതിൽ ...
ഒരുപാട് സ്നേഹമുള്ളൊരു എട്ടന്റെ പെങ്ങളാകാൻ കഴിഞ്ഞതിൽ ....
കരണത്തേക്കടിക്കാൻ നീട്ടുന്ന കൈ കൊണ്ട് കുസൃതിയോടെ ,അതിലേറെ പ്രണയത്തോടെ എന്നെ  നെഞ്ചോടു ചേർക്കുന്ന ഭർത്താവിനെ  കിട്ടിയതിൽ ......
ഒരു ചെറിയ പുഞ്ചിരി കൊണ്ട് , അമ്മേ എന്നുള്ള ഒരു വിളി കൊണ്ട് ലോകത്തെ മുഴുവൻ സന്തോഷങ്ങളും എനിക്ക് സമ്മാനിക്കുന്ന എന്റെ പ്രിയപ്പെട്ട മകളെ വാരിപ്പുണരാൻ കഴിഞ്ഞതിൽ ....

നന്ദി ദൈവമേ ....ഈ ജീവിതം കൊണ്ട് ഞാൻ ഒരുപാട് നേടി .....ഒരുപാടൊരുപാട് ......

സൗഹൃദത്തിന്റെ പച്ചമരത്തണലിൽ ...!!

സൗഹൃദത്തിന്റെ പച്ചമരത്തണലിൽ .!

കൊടുക്കൽ വാങ്ങലുകളുടെ കണക്കുപറയാതെ , കൂടിപ്പോയാൽ പങ്കു വച്ചും കുറഞ്ഞു പോയാൽ പങ്കു നല്കിയും , ഏതു വേനലിലും തണലായി നില്ക്കുന്ന , ഏതു മഴയിലും  കുടയായി വിരിയുന്ന ഒരു മാന്ത്രികതയാണ് സൗഹൃദം...!

രക്തബന്ധത്തിന്റെ   വേലിക്കെട്ടുകൾക്കുമപ്പുറത്ത് വിശ്വാസ്യതയുടെയും , സ്നേഹത്തിന്റെയും , പരസ്പരസഹകരണത്തിന്റെയും മുത്തുകൾ  കൊണ്ട് നമ്മൾ കോർത്തെടുക്കുന്ന മാസ്മരികമായ ഒരു ബന്ധം ...!

നല്ല സുഹൃത്തുക്കൾ ഉണ്ടാകുക ...അതൊരു ഭാഗ്യമാണ് ...
നല്ലൊരു സുഹൃത്തായിരിക്കുക ....അതൊരു പുണ്യവും ....

ജീവിതത്തിന്റെ നല്ലൊരു ശതമാനം കാര്യങ്ങളും നമ്മൾ എപ്പോഴും പങ്കുവയ്ക്കുന്നത് സുഹൃത്തുക്കളുമായിട്ടായിരിക്കും .. സന്തോഷമായാലും , ദുഃഖമായാലും , പാരയായാലും , നേരം പോക്കായാലും ...നാം ആദ്യം പങ്കുവയ്ക്കുക അവരോടാകും ....

സുഹൃത്താകുവാൻ പ്രത്യേകിച്ചു വിദ്യാഭ്യാസ യോഗ്യതയോ , അനുഭവ സമ്പത്തോ ആവശ്യമില്ല ....
കൂടെ നില്ക്കാനും , വീഴ്ചകളിൽ താങ്ങാനും , സന്തോഷങ്ങളിൽ ചിരിക്കാനും ഒരു നിശബ്ദ സാമീപ്യം ...
പിണങ്ങിപ്പിരിഞ്ഞു പോയാലും വീണ്ടും ഒന്നാകും എന്നുള്ള മൗനവാഗ്ദാനം ..
ആരോടെങ്കിലും ഒന്ന് സംസാരിക്കുവാൻ കഴീഞ്ഞെങ്കിൽ എന്ന് തോന്നുമ്പോൾ അരികിലെത്തി തോളോട് ചേർക്കുന്ന ആശ്വാസതീരം ....

ഏതൊരു വ്യക്തിയെ സംബന്ധിച്ചും സൗഹൃദം തന്നെയാകും ഏറ്റവും വിലപ്പെട്ട നിധി ...അച്ഛനോടും , അമ്മയോടും , കൂടപ്പിറപ്പിനോടും പോലും പങ്കുവയ്ക്കാൻ കഴിയാത്ത രഹസ്യപരസ്യങ്ങളുടെ കാവൽക്കാരൻ ആണ് ഒരു സുഹൃത്ത്.

ആരുമാകാം നല്ലൊരു  സുഹൃത്ത് ,,,,അത് ഈ പറഞ്ഞ അച്ഛനോ , അമ്മയോ , കൂടപ്പിറപ്പോ  ആകാം ...തൊട്ടടുത്ത അയൽക്കാരൻ ആകാം ...കൂടെ പഠിച്ചവനാകാം...കൂടെ നടന്നവനോ , അരികിൽ ഇരുന്നവനോ , കൂടെ പണിയെടുത്തവനോ അങ്ങനെ ആരും ....പക്ഷെ അത് ആരാണെന്നു കണ്ടെത്തി അയാളെ കൂടെ കൂട്ടുമ്പോൾ ആണ് ആ സൗഹൃദമരീചിക  നാം തിരിച്ചറിയുന്നതും , മനസ്സിലാക്കുന്നതും ....!

ഞാൻ കണ്ടുമുട്ടുന്ന , ഞാൻ സംസാരിക്കുന്ന , അല്പസമയം എന്നോടൊപ്പം ചിലവഴിക്കുന്ന എല്ലാവരും എന്റെ സുഹൃത്തുക്കൾ ആണ് ...അവർക്കാർക്കും ഒരു പക്ഷെ അങ്ങനെ അല്ലെങ്കിൽ കൂടി ...

അവർ പോലും അറിയാതെ അവർ എനിക്ക് സമ്മാനിക്കുന്ന അമൂല്യമായ നിമിഷങ്ങൾ ഉണ്ട് ...തനിച്ചിരിക്കുമ്പോൾ അവയൊക്കെ ഓർത്തെടുത്ത് ഞാൻ ഒരുപാട് ചിരിച്ചിട്ടുണ്ട് ..., ആസ്വദിച്ചിട്ടുണ്ട് ...!

നല്ല സുഹൃത്തുക്കൾക്കിടയിൽ ഒരു സൗഹൃദ ദിനത്തിന്റെയോ , ആശംസയുടെയോ  ആവശ്യമുണ്ടെന്നു എനിക്കിതേവരെ തോന്നിയിട്ടില്ല ...നാം ആത്മാർത്ഥ സുഹൃത്തുക്കൾ എന്ന് പറയുന്നവരുടെ ആത്മാർത്ഥ സുഹൃത്തു നമ്മൾ ആകണം എന്ന് യാതൊരു നിർബന്ധവും ഇല്ല ...എങ്കിലും ഈ ഭൂമിയിലെ ഒരുവന്റെ ജീവിതത്തിൽ നിർണായകമായ സ്വാധീനം ചെലുത്തുന്ന ഒരു ബന്ധം ആണ് സൗഹൃദം എന്നതിൽ ഒരു സംശയവുമില്ല ...ഒരുവൻ നന്നാകാനും , നശിക്കാനും  ആ കൂട്ട് തന്നെ ഉത്തമം ...

സൗഹൃദദിനം കഴിഞ്ഞു പോയെന്നു അറിയാം ....എങ്കിലും വർഷത്തിലെ എല്ലാ ദിവസവും നമുക്ക്  സൗഹൃദ ദിനം തന്നെ...

ഒരു ചങ്ങാതിയുടെ വാക്കുകൾ കടം കൊണ്ട് അവസാനിപ്പിക്കട്ടെ ,... ...."  SIMPLE ACT OF CARING CREATES AN ENDLESS RIPPLE ..." അതിനോടൊപ്പം എന്റെ കൂട്ടിചേർക്കൽ കൂടി .... " THOSE RIPPLES ARE THE MOST VALUABLE GIFTS YOU CAN GIVE TO YOUR DEAR ONES" 

ആ CARING തന്നെയാണ് എല്ലാ സൗഹൃദങ്ങളുടെയും അടിസ്ഥാനവും നിലനില്പും ...ഒരു നോട്ടം കൊണ്ട് , അല്ലെങ്കിൽ ഒരു വാക്ക് കൊണ്ട് , അതുമല്ലെങ്കിൽ നേരത്തെ പറഞ്ഞ പോലെ നിശബ്ധമായ സാമീപ്യം കൊണ്ട് എന്റെ ഹൃദയത്തിൽ അനന്തമായ തിരകൾ സൃഷ്ടിച്ച എല്ലാ നല്ല സുഹൃത്തുക്കളെയും ഞാൻ ഓർക്കുന്നു ......അവരോടൊപ്പമുള്ള അനിർവചനീയമായ മനോഹര നിമിഷങ്ങളേയും ....

ഒരു ദിനം കൂടി ......!!

ഒരു ദിനം കൂടി ......!!

ഓരോ ദിവസവും മറ്റൊന്നിൽ നിന്നും ഏറെ വിത്യസ്തമാണ് ....ചില പകലുകൾ തീർത്തും തെളിഞ്ഞവയായിരിക്കും ......പുഴയിലെ തെളിനീരിൽ വെള്ളാരം കല്ലുകളെ കാണുന്നത് പോലെ ഹൃദ്യമായ അനുഭൂതികൾ നല്കുന്ന ദിനങ്ങൾ...... ചില ദിവസങ്ങളാകട്ടെ ആകെ നനഞ്ഞു കുതിർന്നിരിക്കും...ഓർക്കാൻ ഒരല്പം കണ്ണുനീർ ബാക്കി വച്ചാകും അത്തരം ദിനങ്ങൾ കടന്നു പോകുക ...എന്നാൽ ചില ദിനങ്ങൾ ഉണ്ട് .....അപ്രതീക്ഷിതമായ പലതും  സമ്മാനിച്ചു കടന്നു പോകുന്നവ .....ഓർമയിൽ സൂക്ഷിക്കാൻ മധുരമുള്ള ഒരു ദിവസം ....അത് പോലെ ഒരു ദിവസമാണ്  പിറന്നാൾ ദിനം ..

ആയുസ്സിന്റെ കണക്കു പുസ്തകത്തിൽ നിന്നും നഷ്ടമാകുന്ന ദിവസങ്ങൾക്കു വേണ്ടിയുള്ള ഒരു ആഘോഷം .... ആ ആഘോഷം സമ്മാനിക്കുന്ന കുറെ നല്ല നിമിഷങ്ങളുണ്ട്‌ ...ആ നിമിഷങ്ങൾക്ക് മുൻപിൽ  മരണം എന്ന സത്യം ഒന്നുമല്ലാതായിപ്പോകുന്നു. അതിനു കാരണം ആ ദിവസത്തെ മധുരമുള്ളതാക്കുന്ന വ്യക്തികൾ തന്നെയാണ് ...

ഏതു നിമിഷവും എന്തും സംഭവിക്കാവുന്ന ജീവിതത്തിൽ ഓർമ്മകൾ മാത്രമാണല്ലോ സ്ഥായിയായി നില നില്ക്കുന്നവ ....അർദ്ധരാത്രി എന്നും പുതിയ പകൽ എന്നും വേർതിരിക്കാതെ ക്ലോക്കിൽ 12:00 അടിക്കുന്നതിനു വേണ്ടിയുള്ള ഒരു കാത്തിരിപ്പുണ്ട്‌ .....
ഓരോ നിമിഷവും ഓരോ യുഗങ്ങളുടെ ദൈർഘ്യമായി മാറുന്ന വേളകൾ...
inbox -ലെ ആദ്യ പിറന്നാൾ ആശംസ ആരുടേതാണെന്ന്  അറിയാൻ .....
ആദ്യം ആരാകും പിറന്നാൾ ആശംസ നേരാൻ ഫോണ്‍ വിളിക്കുന്നത്‌ എന്നറിയാൻ ......വേണ്ടിയുള്ള കാത്തിരിപ്പ് .......അതറിഞ്ഞതിനു ശേഷമേ ഉറക്കം പോലും നമ്മെ അനുഗ്രഹിക്കു .......

പിറന്നാൾ ദിവസം പിന്നെ പറയേണ്ടതില്ലല്ലോ ......അന്ന് വൈകുംവരെ ഫോണ്‍ വിളികളും മെസ്സജുകളും കൊണ്ട് ഒരു ഉത്സവം തന്നെയായിരിക്കും ....

എല്ലാ തിരക്കും ഒഴിഞ്ഞു സ്വസ്ഥമായി ഇരിക്കുമ്പോൾ ആകും കഴിഞ്ഞു പോയ നിമിഷങ്ങളുടെ മൂല്യം എത്രയായിരുന്നു എന്ന് നാം തിരിച്ചറിയുന്നത് ....അവയോരോന്നായി ഓർത്തെടുത്തു പുഞ്ചിരിക്കുന്നത് .......

ഭൂമിയിൽ മനുഷ്യനായി  ജനിക്കാൻ സാധിച്ച്ചവർ  എത്രയോ ഭാഗ്യവാന്മാർ .
" ഭൂമിയിലെ ഓരോ മനുഷ്യന്റെയും ഓരോ നിമിഷവും , ഓരോ പ്രവൃത്തിയും അവന്റെ ആത്മാവിൽ കുറെ നന്മയുടെ മുകുളങ്ങൾ വിരിയിക്കുന്നുണ്ട് ....."" 

ഞാൻ പോലും അറിയാതെ എന്നിലും കുറെ നന്മയുടെ മുകുളങ്ങൾ വിരിയിച്ചെടുത്ത  കുറെ നല്ല സൌഹൃദങ്ങളെ ഓർക്കുമ്പോൾ ഉള്ളിൽ വല്ലാത്തൊരു കുളിര് ........ഇനിയും എന്നെയും കാത്തു എന്തൊക്കെയോ മനോഹര സ്വപ്‌നങ്ങൾ ഇവിടെ ഉണ്ടെന്ന പ്രതീക്ഷ ........ആയുസ്സ് നീട്ടി കിട്ടുമെങ്കിൽ അടുത്ത പിറന്നാൾ ദിനവും മനോഹരമാകുവാൻ വേണ്ടി വീണ്ടും ഒരു കാത്തിരിപ്പ് ബാക്കിയാകുന്നു ........ ഇന്നത്തെ സൂര്യനും അസ്തമിച്ചിരിക്കുന്നു .....

മേടപ്പുലരിക്കു കണിയാകുവാന്‍ കൊന്നപ്പൂവേ നീ വന്നണയൂ......!!!!

മേടപ്പുലരിക്കു കണിയാകുവാന്‍ കൊന്നപ്പൂവേ നീ വന്നണയൂ......!!!!

കണിക്കൊന്നയും കൈനീട്ടവും പേരിനൊരു സദ്യയും പിന്നെ കുറച്ചു പടക്കവും ...അതോടെ ഇത്തവണത്തെ വിഷുവും അവസാനിച്ചു ..ഇനി അടുത്ത വര്‍ഷം വീണ്ടും ഇത് പോലെ .....ആഘോഷങ്ങളൊക്കെ ഒരു കാട്ടിക്കൂട്ടലായി 

മാറിക്കൊണ്ടിരിക്കുകയാണ് ....ആര്‍ക്കോ കൊടുത്ത വാക്ക് പാലിക്കാന്‍ വേണ്ടി വഴിപാടു നടത്തുന്ന പോലെ ...

വിഷു എന്നു നാവു ഉളുക്കാതെ പറയാന്‍ തുടങ്ങിയ നാള്‍ മുതല്‍ എനിക്ക് വിഷു കൈനീട്ടത്തിന്റെ മാത്രം നാളാണ് ...കുറച്ചു പോക്കറ്റ്‌ മണി കിട്ടുന്നത് കൊണ്ട് വിഷുവിനെ സ്നേഹിച്ചിരുന്നു എന്നു മാത്രം ...ഇന്നും അതില്‍ 

കവിഞ്ഞൊരു ആത്മാര്‍ഥമായ അടുപ്പവും എനിക്ക് വിഷുവിനോട് തോന്നുന്നില്ല ....എന്നിരുന്നാലും വിഷു എന്നു കേള്‍ക്കുമ്പോള്‍ എന്ത് കൊണ്ടോ മനസ്സ്  ഒരു ആഘോഷ ചൂടിലേക്ക് നടന്നടുക്കുന്നു ....

ജീവിതത്തില്‍ ഇതിനു മുന്‍പ് ഒരിക്കല്‍ പോലും എനിക്ക് കണിക്കൊന്നകള്‍ ഇത്രയും ഭംഗിയായി തോന്നിയിരുന്നില്ല ....ആദ്യമായി ഈ വിഷു കാലത്താണ് ഞാന്‍ കൊന്ന പൂക്കളുടെ മനോഹാരിത നേരിട്ട് കണ്ടത് ...അവയുടെ ഭംഗി 

അടുത്തു കണ്ടു ആസ്വദിച്ചത് ...അന്നാണ് കൊന്നപ്പൂക്കളും മനം മയക്കുന്ന സുന്ദരിമാരാണെന്ന സത്യം ഞാന്‍ അടുത്തറിഞ്ഞത് ... 

എന്നത്തെയും പോലെ ബസ്സിലെ ജാലകത്തിനടുത്ത ഇരിപ്പിടം കരസ്ഥമാക്കി വഴിയോരക്കാഴ്ചകളിലേക്ക് കണ്ണും നട്ടിരിക്കവേയാണ് കൊന്ന 

പൂവിട്ടു നില്‍ക്കുന്നത് കാണുന്നത് ...

തൊട്ടപ്പുറത്തെ  സീറ്റില്‍ ഇരിക്കുന്ന ആറേഴു വയസ്സ് പ്രായം തോന്നിക്കുന്ന 

ഒരു കുഞ്ഞു ചെക്കന്‍ ...സീറ്റില്‍ നിന്നെണീറ്റ് അതിശയത്തോടെ കൊന്നപ്പൂക്കളെ ചൂണ്ടി      "അമ്മേ ...നോക്ക് ..കണിക്കൊന്ന ..."   എന്നു പറഞ്ഞു പുഞ്ചിരിക്കുന്നു .

ബസ്‌ മുന്നോട്ടു നീങ്ങവേ ആ കുഞ്ഞികണ്ണുകള്‍ പുറകിലേക്ക് ഓടി ആവുന്നത്രയും മനോഹാരിത നുകര്‍ന്നെടുത്തു ... 

അവന്‍റെ അതിശയം കണ്ടു ഞാനും വെറുതെ കൊന്നപ്പൂക്കളെ ഒന്ന് നോക്കി....

പിന്നെ ശ്രദ്ധ പതിയെ അവനിലേക്ക്‌  തിരിഞ്ഞു ..

" അമ്മേ ...എന്നാ വിഷു ...? "

" കുറച്ചീസം കൂടി കഴിഞ്ഞിട്ടാണല്ലോ മോനൂട്ടാ വിഷു ..."

" വിഷൂനു നമ്മള് കൊന്നപ്പൂ കാണൂലെ അമ്മേ ...? "

" കൊന്നപ്പൂ മാത്രോല്ല മോനൂട്ടാ ...കൃഷ്ണനേം ,പൂക്കളേം ,പഴങ്ങളേം , പച്ചക്കറികളേം ഒക്കെ വച്ചു അമ്മ മോനൂട്ടന് കണി കാണിച്ചു തരാല്ലോ ....."

" അപ്പൊ കൈനീട്ടോ അമ്മേ ....??? " -അവന്‍റെ നിഷ്കളങ്കമായ ആ ചോദ്യം അമ്മയില്‍ ഒരു പുഞ്ചിരി ഉളവാക്കി .

" എല്ലാം തരാമെടാ ,,,,,വിഷു ആകട്ടെ ...."

എന്‍റെ സ്റ്റോപ്പ്‌ എത്തി ...ഞാനിറങ്ങി ...അന്ന് ആ വിഷയം അവിടെ അവസാനിച്ചു .

രണ്ടു മൂന്നു ദിവസം കഴിഞ്ഞു ബസില്‍ ഇരിക്കവേ പെട്ടന്ന് അവനെ ഓര്‍ത്തു  , അങ്ങനെ കൊന്നയെയും ...

റോഡിന്‍റെ ഇരുവശങ്ങളിലുമായി കൊന്നമരം പൂവിട്ടു നില്‍ക്കുന്നു .....

കണിക്കൊന്നകള്‍ കൊണ്ട് ആകെയൊരു സ്വര്‍ണമയം ...കാണാന്‍ കണ്ണിനും ,മനസ്സിനും കുളിര്‍മ ....ഇന്നലെ രാവിലെ വരെ ഒരു ദിവസമൊഴിയാതെ 

ആ മനോഹാരിത ഞാന്‍ ആസ്വദിച്ചു .....

അരികിലിരുന്നവരെ  "ദെ നോക്കിയേ ...കണിക്കൊന്ന  ..." എന്നു പറഞ്ഞു വിളിച്ചു കാണിച്ചും  കാണാന്‍ കഴിയാത്തവരോടൊക്കെ ആ മനോഹാരിതയെ കുറിച്ചു പറഞ്ഞും ഞാനും കുറച്ചു ദിവസം അവളെ പ്രണയിച്ചു ....

പ്രകൃതിയെ സുന്ദരിയായി കാണുമ്പോള്‍ മനസ്സിനുണ്ടാകുന്ന സന്തോഷം തിരിച്ചറിഞ്ഞു .....

ഇന്നലെ വൈകിട്ട് അവസാനമായി കൊന്നപ്പൂക്കളെ ഒന്ന് കാണാന്‍ ആഗ്രഹിച്ചു ....വിഷു കഴിഞ്ഞാല്‍ പിന്നെ അവരെ  ഇത്രയും സുന്ദരികളായി കാണാന്‍ പറ്റില്ലല്ലോ .......പക്ഷേ നിരാശയായിരുന്നു ഫലം ...ഒരു കൊന്നപ്പൂവിനെ 

പോലും കാണാന്‍ കഴിഞ്ഞില്ല ....കൊന്ന മരങ്ങളൊക്കെ തിരുപ്പതിക്ക് പോയെന്നു തോന്നുന്നു ....എല്ലാവരും  പൂക്കളെയൊക്കെ കളഞ്ഞു നില്‍ക്കുകയാണ് ....അവിടെയെങ്ങും കൊന്നമരം നിന്നു എന്ന ഓര്‍മ പോലും 

അവശേഷിപ്പിക്കാതെ .....

തിരികെ വീടെത്തുന്നത് വരെ കൊന്നപ്പൂക്കള്‍ വില്‍ക്കുന്ന വഴിയോര കച്ചവടക്കാരെ കണ്ടു ...ഒട്ടിച്ചു വച്ച പ്രൈസ് ടാഗുകള്‍ ഇല്ലാതെ തോന്നിയ വിലയ്ക്ക് വില്പന നടത്തുന്നവര്‍ ....ഒരു സന്ധ്യക്ക്‌ വേണ്ടി മാത്രം കച്ചവടക്കാരായി മാറിയവര്‍ ....കൊച്ചു കുട്ടികള്‍ മുതല്‍ പ്രായമായ 

മുത്തശ്ശിമാര്‍ വരെയുണ്ട് അക്കൂട്ടത്തില്‍ ....ചോദിക്കുന്ന കാശ് കൊടുത്ത് അത് വാങ്ങിക്കൊണ്ട് പോകാന്‍ആള്‍ക്കാരുമുണ്ട് .....

പണ്ട് പറമ്പില്‍ നിന്നവള്‍  ...

ഇന്ന് റോഡില്‍ നില്‍ക്കുന്നവള്‍ ...

നാളെ ഓര്‍മകളില്‍  മാത്രം വിടരാന്‍ പോകുന്നവള്‍ ....

കുറച്ചു കാലം കൂടി കഴിഞ്ഞാല്‍ കൊന്നപ്പൂക്കളും പ്ലാസ്റ്റിക് പൂക്കളായി 

പുനര്‍ജനിക്കുമായിരിക്കണം ......

വിശേഷങ്ങള്‍ വരുമ്പോള്‍ മാത്രം ആവശ്യക്കാരെ ഓര്‍ത്തെടുക്കുന്നവരാണല്ലോ നമ്മള്‍ ...

ഇന്നത്തോടെ കൊന്ന പൂക്കളുടെ ആവശ്യം കഴിഞ്ഞു ...ഇനി അടുത്ത മേട ചൂടില്‍ കണിയൊരുക്കാന്‍ നേരം ഒരു വിഷു പാച്ചില്‍ നടത്തിയാല്‍ മതിയല്ലോ .അവള്‍ ഓടിയിങ്ങു പൂജാമുറിയിലെത്തിക്കോളും ......
കണിയൊക്കെ ഭംഗിയാക്കി കൈനീട്ടവും തന്നു രാത്രിയാകുമ്പോള്‍ തൊടിയിലെ ചവറുകൂനയ്ക്കരികില്‍ അവള്‍ ഉണങ്ങിയുറങ്ങിക്കോളും ......

ആരോടും പരിഭവം പറയാതെ ...... 

അടുത്ത മേടപ്പുലരിക്കു കണിയാകുവാന്‍ കൊന്നപ്പൂവേ നീ വരുമോ ....??????

ഒരു ആണിന്റെ കഥ ....!

ഒരു ആണിന്റെ കഥ ....!

ഈശ്വര സൃഷ്ടികളില്‍ വച്ചു ഏറ്റവും മഹത്തരമായത് മനുഷ്യ 
സൃഷ്ടിയാണെന്നത് ഭൂമിയുടെ ഉത്ഭവം മുതലേ നാം അറിയുന്ന വലിയൊരു സത്യം .
അപ്പോള്‍ മനുഷ്യരായി ഈ ഭൂമിയില്‍ ജനിക്കാന്‍ കഴിയുന്നവര്‍ ഭാഗ്യം ചെയ്തവര്‍ ....
ഈ ജനനത്തിലും ഉണ്ട് വേറൊരു ഭാഗ്യത്തിന്റെ കഥ .....
ആ കഥയുടെ പേര് Royal Birth അല്ലെങ്കില്‍ രാജകീയ ജനനം ...
ഭൂമിയില്‍ ഈ കഥയുടെ അവകാശികള്‍ പുരുഷന്മാരാണ് ...

ആണായി പിറന്നവന്‍ എന്നാല്‍ രാജാവായി ജീവിക്കേണ്ടുന്നവന്‍ എന്നാണ് അര്‍ത്ഥം ..
നിബന്ധനകളും ബന്ധനങ്ങളുമില്ലാത്ത സ്വാതന്ത്ര്യം ഈ ഭൂമിയില്‍ എന്നും അവനു സ്വന്തം ...
പിടിച്ചടക്കലും , ചേര്‍ത്തു വയ്ക്കലും , കിരീടധാരണവും അവന്റെ മാത്രം കുത്തക ...
അവന്റെ വാരിയെല്ല് കടമെടുത്തില്ലായിരുന്നുവെങ്കില്‍ പെണ്ണ് ഈ ഭൂമിക്കെന്നും കിട്ടാക്കനി ...

ഏതൊരു അച്ഛന്റെയും പ്രതീക്ഷ നാളെയ്ക്കു വേണ്ടി അവന്റെ കൈ കൊണ്ട് ഒരു പിടി  ബലിച്ചോര്‍....
ഏതൊരു അമ്മയും പ്രാര്‍ഥിക്കുന്നത് തന്നെ താങ്ങി നിര്‍ത്താന്‍ കെല്‍പ്പുള്ള 
കരങ്ങള്‍ക്കുടമയായ മകനെ .... 
ഏതൊരു ഭാര്യയും ആഗ്രഹിക്കുന്നത് തന്നെ നെഞ്ചോടു ചേര്‍ക്കുന്ന ഭര്‍ത്താവിനെ ...
ഏതൊരു മകളും ബഹുമാനിക്കുന്നത്‌ ആദര്‍ശ ധീരനായ അച്ഛനില്‍ ....
ഏതൊരു മകനും സന്തോഷിക്കുന്നത് നിഴല്‍ പോലെ ഒരച്ഛന്‍ കൂടെയുണ്ടെന്ന് ഓര്‍ത്ത്‌ ...
ഏതൊരു പെണ്ണിന്റെയും സ്വപ്നം തേടുന്നത്  കുതിരപ്പുറത്തേറി തന്നെ സംരക്ഷിക്കാനെത്തുന്ന  ധീരനായ യുവാവിനെ ...
ഏതൊരു സുഹൃത്തും അഭിമാനിക്കുന്നത് തോളോട് ചേര്‍ക്കാന്‍ വിശ്വാസയോഗ്യനായ   ഒരു ആണ്‍ സുഹൃത്ത് കൂടെയുണ്ടല്ലോ  എന്നറിയുമ്പോള്‍ ....

ചരിത്രത്തിന്റെ സുവര്‍ണ ലിപികളില്‍ ഏറ്റവും കൂടുതല്‍ ചേര്‍ക്കപ്പെട്ടത്‌ 
അവന്റെ നാമങ്ങള്‍ ....
ലോകം ഏറ്റവും കൂടുതല്‍ കാതോര്‍ത്തത്‌ അവന്റെ ശബ്ദത്തിന് ....
എല്ലാവരും എന്നും മാതൃകയാക്കാന്‍ പറഞ്ഞത് അവനെ ചൂണ്ടി .....

ഈശ്വരനെ ദര്‍ശിക്കാനും സ്വര്‍ഗത്തില്‍ ജനിച്ചു ജീവിക്കാനും ആദ്യമായി  
ഭാഗ്യം ചെയ്തത് അവന് മാത്രം .....(അവന്‍ കാരണം അവള്‍ക്കും ലഭിച്ചു ആ ഭാഗ്യം )
ഭൂമിയുടെ മനോഹാരിതയിലേക്ക് കണ്ണു തുറക്കാന്‍ മുന്നിലെത്തിയത് അവന്‍ ...
(പിന്നിലായിരുന്നു അന്നും അവള്‍)
ഭൂമിയുടെ അനന്ത നിഗൂഡതയിലേക്ക് അവളെ കൈ പിടിച്ചു നടത്തിയതും അവന്‍ തന്നെ ..
കാട് തെളിച്ചു വയലാക്കി ,വയലിനെ പിന്നെ വീടാക്കി ,വീട്ടിലേക്ക് വെളിച്ചവുമായി കടന്നു 
വന്നത് അവന്‍ .....
രുചിയൂറുന്ന മാംസത്തുണ്ട് അവള്‍ക്കു നല്‍കി പാചകകലയിലേക്ക് അവളെ കൈ പിടിച്ചു 
നടത്തിയതും അവന്‍ ....
അവള്‍ക്കു നാണം മറയ്ക്കാന്‍ പച്ചിലയിതളുകള്‍ കോര്‍ത്തെടുത്തതും അവന്‍ ...
(ഒടുവില്‍ അത് പിച്ചി ചീന്തിയതും അവന്‍ തന്നെ )

അവന്‍ ആയിരുന്നു എന്നും അവള്‍ക്കു കൈത്താങ്ങ്‌ ...
അവന്‍ തന്നെയായിരുന്നു എന്നും അവളുടെ വഴികാട്ടി ....
പ്രണയത്തിന്റെ സംഗീതം അവള്‍ക്കു പാടിക്കൊടുത്തതും അവന്‍ ...
ലോകത്തിന്റെ മാന്ത്രികത അവള്‍ക്കു പകുത്തു നല്കിയതും അവന്‍ ...
അവന്റെ പിന്ഗാമിക്കായി അവളെ പ്രാപ്തനാക്കിയതും അവന്‍ .....

അവന്‍ പുരുഷന്‍ ....
അവന്‍ പൂര്‍ണമായും സ്വതന്ത്രന്‍ ......
അവന്റെ വഴികളില്‍ ബന്ധനത്തിന്റെ ചങ്ങല കെട്ടുകളില്ല ....
അവന്റെ സ്വപ്നങ്ങളില്‍ ഒരിക്കലും കരിനിഴല്‍ കടന്നു കൂടുകയില്ല ....
അവനില്ലാതെ ലോകത്തിന്റെ സഞ്ചാര പഥത്തില്‍ അവള്‍ ഒന്നുമല്ല .....
അവന്‍ പൂര്‍ണത നേടുന്നത് അവളിലൂടെ ...
അവളുടെ ജന്മം സായുജ്യം തേടുന്നത് അവന്റെ കരങ്ങളിലൂടെ .......

ഈ കഥ ഇവിടെ അവസാനിക്കുന്നില്ല .....ഒരു താല്‍ക്കാലിക വിരാമം മാത്രം ...
എല്ലാം എഴുതി തീര്‍ത്തപ്പോള്‍ ഒരു നിമിഷം ഞാനും കൊതിച്ചു പോകുന്നു .....
അടുത്ത ജന്മത്തിലെങ്കിലും ഒരു 
പുരുഷന്‍ ആയി ജനിച്ചെങ്കില്‍ .........!!!!

(സമര്‍പ്പണം :എല്ലാവരും പെണ്ണിനെ കുറിച്ചു മാത്രമേ എഴുതുന്നുള്ളൂ എന്നു പരാതി പറഞ്ഞ ഷിജു ചേട്ടന് .....
ഒപ്പം ഞാനറിയുന്ന എന്റെ പ്രിയപ്പെട്ട ആണ്‍ സുഹൃത്തുക്കള്‍ക്ക് .....)

LIFE...TO LIVE...

LIFE...TO LIVE...

 

Life always give a choice to Us..,a choice to LIVE....
But we forget to utilize this beautiful choice.....
Instead of living ,we find reasons to state the difficulties to live with...

Life is always ready to retrieve the choice of living..if we are not utilizing the choice properly we will lost everything belong to us..

It is very easy to lose something,but difficult to get back again...
we always forget this truth and lost everything - to get what we desire presently....
But the fact is .... what we  lost  was the most precious thing that we once desired for...
so always find reasons to live...
Even if there are thousands of reasons to die,we can surely find a single reason to LIVE...
live your life as you want....
enjoy every moment....
victory will be your's...