എന്തേ വിതുമ്പുന്നതിങ്ങനെ....?

എന്തേ വിതുമ്പുന്നതിങ്ങനെ....?

കവിത ഒന്ന് കേട്ട് നോക്കിയാലോ ....?,ഈ ലിങ്കിൽ ഒന്ന് ക്ലിക്കിക്കോ ...

മുറ്റത്തെ മൂവാണ്ടൻ മാവിന്റെ ചില്ല-

കളോരോന്നായി അലച്ചു വീഴുന്നു .

കാറ്റിലാടുന്ന പൂമര ചില്ലകളെല്ലാമേ 

മൗനം പൂണ്ടു വിതുമ്പിടുന്നു ...

കോലായില,യയിലായി നീരിറ്റും ശീലകൾ 

വീട്ടിലേക്കെന്തെത്തി നോക്കുന്നു ....

പൂവാലിപ്പശുവിന്റെ അകിടിലെ നനവെന്തേ 

ആരെയോ കാത്തു കരഞ്ഞിടുന്നു ...

ഉമ്മറക്കോലായിലിമ്മിണി നാളായി 

പൂവിട്ട മുല്ലകൾക്കെന്തേ മൗനം ...

തെങ്ങിൻ തടത്തേലങ്ങിങ്ങു ചിക്കി -

ചികയുന്ന കുഞ്ഞിയും മക്കളുമെങ്ങു പോയി ...

അങ്ങിങ്ങു ധൂളികൾ പറ്റിപ്പിടിച്ചിട്ടും 

പരിഭവം ചൊല്ലാത്ത പുസ്തകവും ,

മഞ്ഞൾ കറ കൊണ്ട് മേനി നിറഞ്ഞിട്ടും 

കണ്ണീരു കാട്ടാത്ത തളികകളും 

വെള്ളം തളിച്ചിട്ടു ജീവൻ കെടുത്തുമ്പോൾ 

ഉള്ളം പുകയ്ക്കാത്ത കുഞ്ഞടുപ്പും 

ആരെയും കാണാതെ കടുക് മണികൾ-

ക്കിടയിലൊളിക്കുന്ന നാണയവും 

എല്ലാരുമെന്തേ വിതുമ്പുന്നതിങ്ങനെ ,

ഉമ്മറക്കോലായിൽ അമ്മയുണ്ട് .....

വെള്ള പുതപ്പിച്ചു ചന്ദന ധൂപത്താൽ 

പുഞ്ചിരി തൂകിക്കൊണ്ടമ്മയുണ്ട് .....