................................?????????????

................................?????????????

എല്ലാമുണ്ടായിട്ടും ഇടയ്ക്കിടയ്ക്ക്  തോന്നുന്ന ഒരു ഒന്നുമില്ലായ്മ ....അതൊരു തരം ഭീകരമായ അവസ്ഥയാണ് ....അനുഭവിക്കുന്നവർക്ക് തീർത്തും ശൂന്യത തോന്നുകയും എന്നാൽ അതെന്താണെന്ന് പറഞ്ഞു മറ്റൊരാളെ ബോധ്യപ്പെടുത്തുത്താൻ  കഴിയാത്തതുമായ  എന്തോ ഒന്ന് ...


ചിലപ്പോൾ  ആ  ശൂന്യതയിൽ നിന്നും കുറെ ചോദ്യങ്ങൾ ജനിക്കും ...അതിന്റെ ഉത്തരങ്ങൾ കണ്ടെത്തി ക്കഴിയുമ്പോൾ  ആ ഉത്തരങ്ങൾ പുതിയ ചോദ്യങ്ങളായി മാറും .........ഒന്നും അവസാനിക്കുന്നില്ലെന്നും എല്ലാം ഒന്നോടൊന്നു ബന്ധിതമാണെന്നും  ഉള്ള ഒരു ഓർമപ്പെടുത്തൽ  പോലെ ...

PK होने के लिये കുടിക്കണം हे क्या,,,,,,???

PK   होने के लिये  കുടിക്കണം हे  क्या,,,,,,??? 

തികച്ചും വ്യത്യസ്ഥമായത്  എന്ന് പൂർണമായും അവകാശപ്പെടാൻ കഴിയില്ലെങ്കിലും  ഒരല്പം കൂടുതൽ
 വ്യത്യസ്ഥത പുലർത്തുന്ന  ഒരു സിനിമ .....

കാഴ്ചക്കാരന്റെ വ്യക്തി ബോധത്തെയും , സാമൂഹിക ബോധത്തെയും ചിന്താവിധേയമാക്കാൻ   കഴിവുള്ള ഒരു നല്ല സിനിമ .....

അതാണ് PK എന്ന ആമിർഖാൻ -രാജ് ഹിരാനി ചിത്രം ....

എന്നെങ്കിലും ഒരിക്കൽ  സത്യമാകുമെന്ന് ശാസ്ത്രവും  മനുഷ്യനും വിശ്വസിക്കുന്ന അന്യഗ്രഹ ജീവികൾ .....
ലോകത്ത് അനീതികൾ നടക്കുമ്പോൾ അത് പോരാട്ടത്തിലൂടെ തുടച്ചു മാറ്റാൻ 
ഭൂമിയിലെക്കെത്തുന്ന അമാനുഷിക കഥാപാത്രങ്ങൾ .......

ഈ രണ്ടു സങ്കല്പങ്ങളും ഒന്ന് ചേരുമ്പോൾ ഇതൾ വിരിയുന്ന വ്യത്യസ്തനായ ഒരു മനുഷ്യൻ തന്നെയാണ് PK.....

അന്യഗ്രഹത്തില്‍ നിന്നും ഭൂമിയിലെക്കെത്തുന്ന ഒരു മനുഷ്യന്‍...

  ഭൂമിയിലിറങ്ങിയ ആദ്യ നിമിഷങ്ങളില്‍ തന്നെ തിരികെ പോകാനുള്ള
 സ്പേസ്ഷിപ്പിന്റെ കണ്ട്രോള്‍ മോഷ്ടിക്കപ്പെടുന്നു .അത് അന്വേഷിച്ചു നടക്കുന്നതിനിടയില്‍ അയാള്‍ക്ക് നേരിടേണ്ടി വരുന്ന പ്രശ്നങ്ങളും
 ഒപ്പം ഭൂമിയിലെ മനുഷ്യരുടെ വാക്കുകളിലും ,പ്രവൃത്തികളിലും അയാള്‍ 
കണ്ടെത്തുന്ന റോങ്ങ്‌ നമ്പറുകളുമാണ്‌ സിനിമയുടെ ഇതിവൃത്തം .


അടിസ്ഥാനപരമായി PK ഒരു പ്രണയ കഥയാണെന്ന് പറയാം ..

തന്റെതല്ലാത്ത കാരണങ്ങളാൽ നായികയ്ക്ക് നഷ്ടമായ കാമുകനെ വീണ്ടെടുത്തു കൊടുക്കുന്ന ഒരു  അന്യഗ്രഹ മനുഷ്യന്റെ കഥ ....

ആ വീണ്ടെടുക്കൽ നടക്കുന്നതിനു മുൻപ് എപ്പോഴൊക്കെയോ 
പ്രണയം ഒരു സമയം കൊല്ലിയാണെന്ന് ബോധ്യമുണ്ടായിട്ടും  
നായികയെ പ്രണയിക്കുന്ന ,സ്വന്തമാക്കാൻ ശ്രമിക്കാതെ വിട്ടു കൊടുക്കാൻ തയാറാകുന്ന  അന്യഗ്രഹ മനുഷ്യന്റെ കഥ ...

കള്ളമെന്ന വാക്കിന്റെ അതി മധുരം നുണയാത്ത ഒരു ഗ്രഹത്തില്‍ നിന്നും ഭൂമിയിലെത്തിയ PK തിരികെ മടങ്ങുന്നത്  ഒരു വലിയ കള്ളം 
പറഞ്ഞു കൊണ്ടാണ് ...
ഒപ്പം സ്നേഹമെന്ന വാക്കിന്റെ അര്‍ത്ഥം എന്താണെന്നു തനിക്കു ചുറ്റുമുള്ളവര്‍ക്ക് പഠിപ്പിച്ചു  കൊടുക്കുകയും ചെയ്യുന്നു .....

PKയും നായികയും ഒരുമിച്ചു അന്യഗ്രഹത്തിലേക്ക് പറക്കും എന്ന ഒരു ശരാശരി  കാഴ്ചക്കാരന്റെ പ്രതീക്ഷയെ തിരുത്തി ക്ലൈമാക്സില്‍
 ഒരു  ട്വിസ്റ്റ്‌ കൊണ്ടുവരാനുള്ള ശ്രമം പരാജയമായില്ലെന്നത് ഉറപ്പിക്കാം ....

കാമുകനെ നായികയ്ക്ക് സമ്മാനിച്ചു കൊണ്ട്  
സ്നേഹത്തിന്റെ മഹത്വം പിടിച്ചടക്കലില്‍ അല്ല ..വിട്ടു കൊടുക്കലിലാണ് 
എന്ന സത്യത്തെ ഒന്ന് കൂടി ഉറപ്പിക്കുകയാണിവിടെ ..


രൂപം കൊണ്ട് ഒരു മനുഷ്യന്റെ ജാതി മനസ്സിലാക്കാൻ സാധിക്കുമെന്ന തെറ്റിദ്ധാരണയെ 
 തലപ്പാവിന്റെയും ,താടിയുടെയും മീശയുടെയുമൊക്കെ സഹായത്തോടെ മാറ്റിയെടുക്കുകയാണ് PK.

അതോടൊപ്പം  ഈശ്വരനും മനുഷ്യനുമിടയിലെ  ഹംസങ്ങളുടെ  ആവശ്യകതയെ ചോദ്യം ചെയ്യാനും മറന്നിട്ടില്ല ....

വ്യത്യസ്തമായി ചിന്തിക്കുകയും , പ്രവർത്തിക്കുകയും ചെയ്യുന്നവരെ 
സ്ഥിരതയില്ലാത്തവരായി മുദ്ര കുത്തുന്ന ഒരു  ലോകത്തിൽ എത്തിപ്പെട്ടത്
 കൊണ്ടാണ് അയാൾക്ക് PK എന്ന പേര് പോലും കിട്ടുന്നത് ..

കുടിക്കാതെ കുടിയനായി മാറിയ ഒരുവൻ ..

ഒരു പക്ഷേ ഈ കഥാപാത്രത്തിന് ഇതിനെക്കാൾ യോജിക്കുന്ന മറ്റൊരു പേര് ഇല്ലെന്നതാണ് സത്യം ...


PK നമുക്ക് മുൻപിലിടുന്ന ചോദ്യങ്ങൾ വളരെ പ്രസക്തമാണ് ....

ദൈവം തന്നെ ഒരു സങ്കല്പ്പമാണ് ...
നമ്മുടെ ദൈവങ്ങളെല്ലാവരും മനുഷ്യന്മാർ ആയിരുന്നു ...
ആ ദൈവങ്ങളെ നമ്മൾ വിശ്വസിക്കുന്നു ..
എല്ലാത്തിനും മുകളിലുള്ള ഒരു അത്ഭുത ശക്തിയായി നാം ദൈവത്തെ കാണുന്നു ....
പിന്നെ എന്തിനാണ് ആ ദൈവത്തിനോട് പ്രാർത്ഥിക്കാനും  അപേക്ഷിക്കാനും നമുക്കിടയിൽ ഒരാൾ ...?????


ആൾ ദൈവങ്ങൾ കൊടികുത്തി വാഴുന്ന ലോകമാണ് നമ്മുടേത്‌ ...

കല്ല്‌ വച്ച മാലയും വളയുമിട്ടാൽ എല്ലാ പ്രശ്നങ്ങളും തീരുമെന്ന് 
അന്ധമായി വിശ്വസിക്കുന്ന ആളുകളുടെ ലോകം ...

ഈശ്വരന്റെ മെസ്സെഞ്ചർമാരാണ്  സ്വാമികളും ,
സ്വാമിനിമാരുമെന്നും കരുതി  അവരെ   വാഴ്ത്തുന്നവരുടെ  ലോകം ...

ഇവിടെ PK  ഉന്നയിക്കുന്നത് തികച്ചും ന്യായമായ കാര്യങ്ങളാണ് .....


നമ്മളൊക്കെ ദൈവത്തിന്റെ സൃഷ്ടികൾ എങ്കിൽ ആ സൃഷ്ടികൾ ദൈവത്തിനു 
വേണ്ടി സ്വന്തം ശരീരവും മനസ്സും സമ്പത്തും മറ്റുള്ളവർക്ക് 
പണയം വെക്കേണ്ടുന്നതിന്റെ ആവശ്യകത എന്താണ് ...??


വിരലിലെണ്ണാവുന്നതിനെക്കാൾ  കൂടുതൽ ദൈവങ്ങൾ നമുക്കില്ലേ ...
അവരിൽ ഏതു ദൈവമാണ് ശരിക്കും നമ്മളെ സംരക്ഷിക്കുന്നത് ....??
നമ്മളൊക്കെ ദൈവത്തിന്റെ മക്കൾ എങ്കിൽ എന്തിനു നമ്മുടെ
 ആവശ്യങ്ങൾ നടപ്പിലാക്കി തരാൻ ദൈവം പണമായും പാരിതോഷികമായും കൈക്കൂലി  വാങ്ങുന്നു ....?? 


ഇത്തരം ചര്‍ച്ചാ വിഷയമാകേണ്ട ചോദ്യങ്ങള്‍ ആണ് PK നമ്മളോട് ചോദിക്കുന്നതും .

ദൈവം ഒരു വലിയ വിശ്വാസമാണ് ..ആ വിശ്വാസമാണ് ഈ ഭൂമിയിലെ ഓരോ പ്രശ്ശ്നങ്ങളില്‍ നിന്നും  കരകയറാന്‍ നമുക്ക് ആത്മധൈര്യം പകരുന്നതും ...

ആ വിശ്വാസം ഒരിക്കലും ഭണ്ടാരപ്പെട്ടിയിലെ മൂല്യം കൂടിയ 
നാണയങ്ങളോ , കത്തിക്കുന്ന മെഴുകുതിരിയുടെ എണ്ണങ്ങളോ , അലങ്കരിക്കുന്ന പട്ടുടയാടകളോ അല്ല നിശ്ചയിക്കുന്നത് ...

വിശ്വാസം പ്രദര്‍ശനമല്ലെന്നും അത് ഒരു പ്രാര്‍ത്ഥനയാണെന്നും ,
മനസ്സിന്റെ വിശുദ്ധിയിലും ,പ്രവൃത്തിയുടെ സത്യസന്ധയിലും 
ആണ് അതിന്റെ പരമമായ സത്യം എന്നുമുള്ള സന്ദേശം ...
അതാണ് PK നമുക്ക് സമ്മാനിക്കുന്നത്.

ചിന്തകൾ കാട് കയറുമ്പോൾ .......!

ചിന്തകൾ കാട് കയറുമ്പോൾ .......!

                        മനുഷ്യൻ എല്ലായിപ്പോഴും അവന്റെ ചുറ്റുപാടുകളെ  കുറിച്ച് വല്ലാതെ ഉത്കണ്ഠാകുലനാണ് ...ഭൂരിഭാഗം പേരും സ്വന്തം മനസ്സിനെ അല്ല ,മറ്റുള്ളവരുടെ മനസ്സിനെ തൃപ്തിപ്പെടുത്താൻ വേണ്ടിയാണ് ഓരോന്ന് കാട്ടികൂട്ടുന്നത്‌ ....ചെയ്തത് അല്ലെങ്കിൽ ചെയ്യുന്നത് എന്താണെന്നോ എന്തിനാണെന്നോ ചെയ്യുന്നവന് തീരെ നിശ്ചയമില്ലാത്ത ഒരു അവസ്ഥ .....എന്നിട്ടും എന്തൊക്കെയോ ചെയ്തു കൂട്ടുന്നു ...ആരെയൊക്കെയോ ബോധ്യപ്പെടുത്താൻ വേണ്ടി ...അത് കൊണ്ട് തന്നെ തീർത്തും സന്തുഷ്ടനായ ഒരു മനുഷ്യനെ ഈ ഭൂമിയിൽ കണ്ടെത്താൻ കഴിയുമോ എന്നത് സംശയമാണ് ....


 ഒടുവിൽ സംഭവിക്കുന്നതോ ....????തിരിഞ്ഞു നോക്കുമ്പോൾ സ്വന്തമായി ഒരു നിമിഷം പോലും തനിക്കു വേണ്ടി ജീവിച്ചിട്ടില്ലാത്തവൻ എന്ന ചിന്ത മാത്രം ബാക്കി ....അങ്ങനെ ബാക്കിയാകാൻ ചിന്തകൾ  അവശേഷിക്കാത്തവനാണ് നിങ്ങൾ എങ്കിൽ സമൂഹം നിങ്ങളെ സ്വാർത്ഥൻ  എന്നു  വിളിച്ചേക്കാം ...

സ്വയം ജീവിക്കാത്ത ഒരുവൻ എങ്ങനെ അപ്പോൾ ഭാഗ്യവാനാകും ...???
ഒരു വ്യക്തിക്കും സ്വന്തമായി ഒരു നിലനില്പ്പ്  ഇല്ലല്ലോ  .ഒരുവന്റെ ജീവിതം എപ്പോഴും പ്രത്യക്ഷമായോ പരോക്ഷമായോ മറ്റൊരു കൈകളുടെ താങ്ങിലാണ് ...അങ്ങനെയുള്ളപ്പോൾ തീർച്ചയായും ഒരുവൻ സ്വയം ജീവിക്കുകയല്ല ,മറ്റുള്ളവർക്ക്  വേണ്ടി ജീവിച്ചു സ്വയം സന്തോഷം കണ്ടെത്തുകയാണ് എന്നതല്ലേ സത്യം ...?

ജീവിതം വളരെ ചെറുതല്ലേ മാഷേ ....ആ പുസ്തകത്തിന്റെ ഓരോ താളുകളിലും നമ്മുടെ പേരുണ്ടെങ്കിൽ  ഈ ഭൂമി വിട്ടു പോയിട്ടും ആ പുസ്തകത്താളുകളിലൂടെ  കാലാതീതനായി നമ്മൾ നിലനിൽക്കുമെങ്കിൽ അതല്ലേ ഈ ഭൂമിയിൽ ജീവിച്ചതു കൊണ്ട് നാം നേടിയെടുത്ത ഭാഗ്യം ....??

നമ്മുടെ നാമം ചരിത്രത്തിൽ എഴുതേണ്ടത് നമ്മളല്ല .....നമ്മുടെ പ്രവൃത്തികളെ സ്നേഹിക്കുന്നവരാണ് ...നന്മ ചെയ്യാൻ എല്ലാവർക്കും എപ്പോഴും കഴിഞ്ഞെന്നു വരില്ല ...തിന്മകൾ   ചെയ്യുന്നതിനേക്കാള്‍ നല്ലത് ഒന്നും ചെയ്യാതിരിക്കലാണ് ...

എവിടുന്നു തുടങ്ങിയെന്നു എനിക്കും നിശ്ചയമില്ല ...എവിടേക്കാണ്‌ കൊണ്ട് പോകുന്നതെന്നും ..എങ്കിലും സ്വയം ഞാൻ ഒരു എഴുത്തുകാരനാണ്‌ എന്ന ചിന്തയുള്ളിടത്തോളം എവിടെ നിന്നു വേണമെങ്കിലും എനിക്ക് തുടങ്ങാം ...തല്കാലത്തേക്ക് ഒരു കുത്തിട്ടു കൊണ്ട് അവസാനിപ്പികുകയും ചെയ്യാം .
അത് കൊണ്ട് തന്നെ ഒരു കുത്തിട്ടു ഇപ്പോഴത്തെക്ക് അവസാനിപ്പിക്കുന്നു .

ജീവിതം ഇങ്ങനൊക്കെയാണ് ഭായ് ......!

ജീവിതം ഇങ്ങനൊക്കെയാണ് ഭായ് ......!



ജീവിതം ഇടയ്ക്കൊക്കെ നമ്മെ  നോക്കി പുഞ്ചിരിക്കുന്നു ...നമ്മെയും ചിരിക്കാന്‍ പഠിപ്പിക്കുന്നു .
എന്നിട്ടും എന്ത് കൊണ്ടോ  കണ്ണീരിന്‍റെ 
നനവുള്ള സത്യങ്ങള്‍ നമ്മളില്‍  നിന്നും മാഞ്ഞു പോകുന്നില്ല ...


കാലം നമ്മളെ പലതും മറക്കാന്‍ പഠിപ്പിക്കുന്നു ...പലതും മറക്കണമെന്ന് അതിയായ ആഗ്രഹമുണ്ട് ..
പക്ഷേ മറക്കാന്‍ ശ്രമിക്കുംതോറും 
ഓര്‍മ്മകള്‍ നമ്മില്‍  മഴയായി പെയ്യുന്നു .


ജീവിതം നമുക്ക് പലതും നല്‍കുന്നു ..ചിലപ്പോള്‍ ഒരു വാക്ക് 
പോലും ചോദിക്കാതെ തന്നതൊക്കെ നമ്മളില്‍ നിന്നും എന്നെന്നേക്കുമായി തിരിച്ചെടുക്കുന്നു ...
പഴി ചാരിയും കരഞ്ഞും ജീവിതത്തെയും അത് സമ്മാനിച്ച ശക്തിയെയും  
കുറ്റപ്പെടുത്തുന്നതല്ലാതെ 
ജീവിതമെന്തെന്ന് അറിയാന്‍ നാം ശ്രമിക്കുന്നില്ല..
ജീവിതം നമ്മള്‍ എങ്ങനെയൊക്കെയോ ജീവിച്ചു തീര്‍ക്കുന്നു ..



പരസ്പര വിശ്വാസമാണ് ബന്ധങ്ങളുടെ അടിസ്ഥാനമെന്ന് നാം പറയുന്നു .
പക്ഷേ മറ്റുള്ളവരെ അംഗീകരിക്കാനോ , മനസ്സിലാക്കാനോ നാം തയാറാകുന്നില്ല ..
പകരം നമ്മുടെ വിശ്വാസങ്ങള്‍ മറ്റുള്ളവരില്‍ അടിച്ചേല്‍പ്പിക്കാന്‍ നമ്മള്‍ പെടാപ്പാട് പെടുന്നു .


നേട്ടങ്ങളെക്കാളുപരി നഷ്ടങ്ങളുടെ പുസ്തകമാണ് ജീവിതമെന്ന് നമ്മള്‍ പറയുന്നു .എന്നാല്‍ ഈ നഷ്ടങ്ങള്‍ 
വരുത്തുന്നത് നമ്മളാണെന്ന് നാം തിരിച്ചറിയുന്നില്ല ...നഷ്ടങ്ങള്‍ നികത്താനൊട്ട് ശ്രമിക്കുന്നുമില്ല ..


ആശയത്രേ നിരാശയ്ക്ക് ഹേതു ...ആശിക്കാതിരിക്കാന്‍ നമുക്ക് കഴിയുന്നില്ല ...
ആശിച്ചതൊക്കെ നേടാന്‍ നാം കഷ്ടപ്പെടുന്നില്ല ..
പിന്നെങ്ങനെ നിരാശപ്പെടാതിരിക്കും ......???


മറ്റുള്ളവരുടെ തെറ്റിനെ ചികഞ്ഞു കണ്ടെത്തുന്നു ..
സ്വന്തം തെറ്റുകളെ മറയ്ക്കാന്‍ മറ്റുള്ളവരുടെ ശരികളെ തെറ്റുകളെന്നു മുദ്ര കുത്തുന്നു .
നമ്മുടെ തെറ്റുകളെ ശരികളായി വ്യാഖ്യാനിക്കുന്നു ... 



സ്നേഹിക്കുന്നുവെന്ന് ആണയിടുന്നു .പക്ഷേ പലപ്പോഴും 
സ്നേഹം അഭിനയമായി മാത്രം മാറുകയാണെന്ന് തിരിച്ചറിഞ്ഞിട്ടും അത് തുറന്നു സമ്മതിക്കുന്നില്ല....



സ്വന്തം താല്പര്യങ്ങളാണ് വലുതെന്നുള്ള ഉറച്ച വിശ്വാസം ...അത് നമ്മള്‍ പോലുമറിയാതെ നമ്മളെ സ്വാര്‍ത്ഥരാക്കി  മാറ്റുന്നു ... 


തമ്മില്‍ നമ്മള്‍ ഒരിക്കലും ചേര്‍ന്നു പോകില്ലെന്ന് അറിഞ്ഞിട്ടും പരസ്പരം നമ്മള്‍ നമ്മളെ തന്നെ ക്രമീകരിക്കുന്നു ..
ആര്‍ക്കൊക്കെയോ വേണ്ടി .....


ആരെയൊക്കെയോ  അല്ലെങ്കില്‍ എന്തിനെയൊക്കെയോ ഭയന്നു ജീവിതത്തില്‍ നമ്മള്‍ ആഗ്രഹിച്ച ചിലതിനെയൊക്കെ പാതി വഴിയില്‍ ഉപേക്ഷിക്കുന്നു ....എന്നിട്ട് ഒരു ദീര്‍ഘനിശ്വാസത്തോടെ എന്തിന്റെയൊക്കെയോ പുറകെ 
ആര്‍കൊക്കെയോ വേണ്ടി വീണ്ടും ഓടുന്നു 


നമ്മള്‍ സമ്മതിച്ചാലും ഇല്ലെങ്കിലും  ജീവിതം ചിലപ്പോഴൊക്കെ ഇങ്ങനാണ് ഭായ് ....

ഇനിയും ഇങ്ങനൊക്കെ തന്നെ അങ്ങു ജീവിക്കേം ചെയ്യും .....