ഒരു കുഞ്ഞു പൂവിന്റെ ഓർമയ്ക്ക്

ഒരു കുഞ്ഞു പൂവിന്റെ ഓർമയ്ക്ക്...

ആഴിക്കുളിരിന്റെ  ആഴത്തിനുള്ളിലെ 

അമ്മക്കഥയുടെ പൊരുൾ തേടി ,

ആരോരുമറിയാതെ പോയോ നീ-

യൊരു നാളിൽ തോണിയിലേറി മെല്ലെ .

പവിഴക്കുടകീഴിലുറങ്ങും  പളുങ്കിന്റെ 

പരിമളം തേടി നീ പോയതാണോ ...?

ഏഴാം കടലിനുമക്കരെ  കാണുന്ന 

മാളിക നിന്നെ വിളിച്ചതാണോ ..?

അമ്പിളി മാമനെ കുമ്പിളിൽ കാട്ടി-

യിട്ടമ്മ താരാട്ടുമോമന പൈതൽ നീ .

അമ്മിഞ്ഞപ്പാലിന്റെ നേരിനുള്ളിൽ 

തനയ വിശ്വാസത്തിൻ കാതലും നീ .

മതമില്ല , ജാതിയും നിറവുമില്ലോമനെ

ദേവ പൂവാടി തൻ കുളിരാണ് നീ ...

വാക്കിന്റെ കള്ളവും , നോക്കിന്റെ ചിന്തയും 

സ്മേരത്തിൻ കൂരമ്പും നിനക്കന്യമല്ലോ ...

ആരോ തൊടുത്തിട്ട ക്രൂരമാമമ്പിനാൽ 

ഇഹലോകം നിന്നിലെ സ്വപ്നമായോ ....

തിരകളാൽ താരാട്ടി , കാറ്റിനാൽ  നീരൂട്ടി

തീരത്തണഞ്ഞു നീ വിശ്വത്തിൻ നോവായി ...

ഉറങ്ങു നീയെല്ലാം മറന്നിടാൻ ...

ഉണരൂ നീ മാറ്റത്തിൻ കാവലാകാൻ ....

നീ മറഞ്ഞെങ്കിലും , മായുകില്ല ..

ഐലാൻ ..നീ ഞങ്ങളിൽ ജീവിച്ചിടും ..