മാപ്പ് ........
മാപ്പു ചോദിക്കുന്നു ഞാന്‍ സഖി
നിന്നോട് മാപ്പ് ചോദിക്കുന്നു.....
നിന്നിളം ചൊടിയില്‍ വിതുമ്പി നില്‍ക്കുന്ന
വാക്കിനോടും ഞാന്‍ മാപ്പ് ചോദിക്കുന്നു ......
നിന്‍ മിഴിത്തണ്ടില്‍ തിളങ്ങി നില്‍ക്കുന്ന
കണ്ണുനീര്‍ പൂക്കള്‍ക്ക് മാപ്പ് .....
നിന്‍ നാസികത്തുമ്പില്‍ നിന്നുതിര്‍ന്നു വീണ
ശ്വാസബിന്ദുക്കള്‍ക്കും മാപ്പ് .....
നിന്‍ കര്‍ണപുടങ്ങള്‍ താലോലിച്ചൊരി
ശബ്ദമാധുരിയോടും ഞാന്‍ മാപ്പ് ചോദിക്കുന്നു .....
നിന്‍ നെഞ്ചിനുള്ളില്‍ പിടഞ്ഞു വീണ
നിറമെഴും കിനാക്കള്‍ക്കും മാപ്പ്...
എനിക്കായി നീ പകുത്തു നല്‍കിയ
നിന്‍റെ ഹൃദയത്തിനും മാപ്പ് .....
എന്നോര്‍മതന്‍ തടവറയില്‍ നീന്തിക്കളിച്ച
നിന്‍ സ്വപ്നങ്ങളോടും ഞാന്‍ മാപ്പ് ചോദിക്കുന്നു ........
എന്നിരുള്‍വഴിയിലൊരു മിന്നാമിനുങ്ങായി
പറന്നു വന്ന നിന്‍റെ കനിവിനും മാപ്പ് ........
എന്‍റെ എകാന്തമാം പകല്‍ വേളകളെ കുളിരണിയിച്ച
നിന്‍ പുഞ്ചിരിയോടും ഞാന്‍ മാപ്പ് ചോദിക്കുന്നു ....
ഇളവെയിലില്‍ ഈ മണല്‍ത്തിട്ടില്‍ നിന്‍റെ മടിയില്‍
തലചായ്ച്ചുറങ്ങിയ പ്രിയനിമിഷങ്ങള്‍ക്കു മാപ്പ് ....
ഈ വഴിയെ കടന്നു പോയ കാറ്റിനും , കുളിരിനും
നിറവാര്‍നിലാവിനും മാപ്പ് ........
എന്‍റെ ഇരവിനെ പകലാക്കി മാറ്റിയതിലൊരുപിടി
പ്രതീക്ഷകള്‍ പാകിയ നിന്‍റെ വദനത്തിനോടും
ഞാന്‍ മാപ്പ് ചോദിക്കുന്നു ....
പുലരൊളിയില്‍ നാം നെയ്ത സ്സ്വപ്നങ്ങ-
ളിരവിന്റെ മടിയില്‍ പിടഞ്ഞുവീഴുമ്പോളന്നു
നിന്‍റെ കനിവില്‍ നിന്നൂറിയ ആശ്വാസവാക്കിനും മാപ്പ് .....
എന്നെ വിട്ടകലേക്ക് മായുന്ന സന്ധ്യയോടും ,
നിന്‍റെ നെറ്റിയില്‍ സിന്ദൂരം ചാര്‍ത്തിയ
സൂര്യാംബരത്തോടും മാപ്പ് ചോദിക്കുന്നു ..............
ഇനിയും തിരികെ വരാതെ നിന്നെ വിട്ടകലേക്കു
പോയതെന്തിനിന്നോര്‍ത്തു തേങ്ങുന്നു ഞാനിന്നും .
എന്‍ പ്രണയ പരാദങ്ങളില്‍ പാറിക്കളിച്ച
നിന്‍ പുഞ്ചിരിപ്പൂക്കളെയോര്‍ക്കുന്നു ഞാന്‍ ...
നിന്‍ കൈ വിടുര്‍ത്തി ഞാന്‍ ദൂരേക്ക്‌ മറയുമ്പോള്‍
വാടി വീണ ചെമ്പകപ്പൂവിന്‍റെ -
മാറില്‍ത്തറച്ചു നിന്ന രക്തബിന്ദുക്കള്‍ക്ക്‌ മാപ്പ് .........
നിന്‍ തപ്ത ഹൃദയത്തിന്‍ നൊമ്പരം കാണാതെ...,..
നിന്‍ ചുടുനീര്‍ കണങ്ങളെ നെഞ്ചിലേറ്റാതെ........
നിന്‍ നിനവില്‍ കരിനിഴല്‍ പാകി അകലേക്കുമാഞ്ഞു ഞാനെന്തിനോ .
എല്ലാം പൊറുക്കുവാന്‍ , എന്നെ മറക്കുവാന്‍
വിധി നിന്നിലേല്പിച്ച മുറിവെത്ര ക്രൂരമെന്നോര്‍ത്തു ഞാന്‍ .
മാപ്പ് ചോദിച്ചു ഞാന്‍ തിരികെയെത്തവെ
മാപ്പേകുവാന്‍ കാത്തു നില്‍ക്കാതെ മരണത്തിന്‍ മടിയില്‍ മയങ്ങിയോ നീ .........?
ഇനിയെന്ത് ബാക്കി .....??
പറയുവാന്‍ , കേള്‍ക്കുവാനോര്‍ക്കുവാന്‍
നല്‍കുവാന്‍ ഓര്‍മ്മകള്‍ മാത്രം ബാക്കി ...... !!!
No comments:
Post a Comment
വായിച്ചിട്ടുണ്ടേല്‍ എന്തേലും അഭിപ്രായമൊക്കെ പറഞ്ഞിട്ട് പോകുട്ടോ .......